പുഴയെ വരക്കുമ്പോള്‍

ചിത്രകാരാ...
പുഴയെ വരച്ചോളൂ,
ഭംഗിയില്‍, മോടിയില്‍
‍അതിന്‍റെ തീരങ്ങള്‍ വരച്ചോളൂ...
തീരത്ത്‌ കെട്ടിയിട്ട കൊതുമ്പുവള്ളം
ചാഞ്ഞു നില്‍കുന്ന തെങ്ങ്‌
പടര്‍ന്ന വെള്ളിലം താളി
പുഴയെ മോഹിക്കുന്ന ഒരു മരം
ചില്ലയില്‍ മിന്നുന്ന പൊന്‍മാന്‍
താഴ്‌ന്നു പറക്കുന്ന ചെമ്പരുന്ത്‌
കെട്ടിയിറക്കിയ കടവ്‌
കടവില്‍ നീന്തിത്തുടിക്കുന്ന കുട്ടികള്‍

പുഴയെ വരച്ചോളൂ...
മറന്നു പോകരുതതിന്‍റെ
സമയദൂരം, ആഴം, വര്‍ണ്ണം.
പ്രകാശം പറയുന്നതാണ്‌ പുഴയുടെ നിറം.
മുലക്കച്ചയുടുക്കാത്ത
നിത്യകന്യകയായിരുന്നു പുഴ
എഴുപതുകളില്‍ ചുവന്നതും അവള്‍
അലക്സാണ്ടറുടെ പടയോട്ടത്തെതടഞ്ഞതും
അവള്‍ തന്നെ.

എണ്‍പതുകളില്‍
എന്‍റെ പ്രിയസഖി
അന്നവള്‍ പഞ്ചാര മണല്‍തിട്ടകളില്‍
ഓടിനടന്ന കുറുമ്പത്തി
പരല്‍മീനുകളുടെ ഏലസ്സണിഞ്ഞവള്‍
പോക്കുവെയില്‍ മിന്നുന്ന ഉടയാടയുടുത്തവള്‍
ഡിസംബറില്‍ പൂര്‍ണനഗ്ന
കണ്ണാടി നീലജലം കൊണ്ടൊരു മന്ത്രജാലം
കക്കകളുടെ നേര്‍വരകളാല്‍
മേനിനിറയെ ചുട്ടികുത്തിയവള്‍
കര്‍ക്കിടകത്തില്‍ പതഞ്ഞവള്‍
മഞ്ഞയുടയാട ചുറ്റിയവള്‍
രുദ്രയെപ്പോല്‍ അലറിയവള്‍
മകരത്തില്‍ ആട്ടിന്‍കുട്ടി
കരവലയത്തില്‍ ഉമ്മവക്കുന്ന
നാണം കുണുങ്ങി.

പുഴയെ വരച്ചോളൂ...
മറന്നുപോകരുത്‌ പുഴയുടെ മനസ്സ്‌,
ധമനികള്‍,പാല്‍ചുരക്കും സ്തനദ്വയങ്ങള്‍.
പുഴ കുടിച്ചു വറ്റിച്ചവര്‍
പുഴയെ തിന്നവര്‍
പുഴയില്‍ കുളിച്ചവര്‍
പുഴ കടന്നവര്‍
പുഴയിലൂടൊഴുകിയവര്‍
പുഴയില്‍ ചത്തവര്‍
പുഴകുഴിച്ച്‌ പൊന്‍മണലെടുത്തവര്‍
പുഴയിലൊഴുക്കിയ ആത്മാക്കള്‍,
ചപ്പ്‌, ചവറ്‌, വിഷം, മാലിന്യങ്ങള്‍
‍എല്ലാം വരക്കണം.

മതി, ഇനിയിപ്പോള്‍
പുഴയെ വരക്കാന്‍
നിന്‍റെ വര്‍ണ്ണജാലങ്ങളൊന്നും വേണ്ട.
ചത്തുമലച്ച ഒരുശവം വരക്കണം
ശവം തീനിപ്പക്ഷികള്‍ പോലും
കൊത്താനറക്കുന്ന
വിഷം തിന്നു ചീര്‍ത്തപുഴയുടെ ശവം.
കഴിയുമെങ്കില്‍ വരച്ചുചേര്‍ക്കൂ
മതിവരാത്ത ദാഹങ്ങളുടെ
ഒരു റീത്ത്‌.

Comments

  1. ചിത്രകാരാ...
    പുഴയെ വരച്ചോളൂ,
    ഭംഗിയില്‍, മോടിയില്‍

    ReplyDelete
  2. "മതി, ഇനിയിപ്പോള്‍
    പുഴയെ വരക്കാന്‍
    നിന്‍റെ വര്‍ണ്ണജാലങ്ങളൊന്നും വേണ്ട.
    ചത്തുമലച്ച ഒരുശവം വരക്കണം
    ശവം തീനിപ്പക്ഷികള്‍ പോലും
    കൊത്താനറക്കുന്ന
    വിഷം തിന്നു ചീര്‍ത്തപുഴയുടെ ശവം.
    കഴിയുമെങ്കില്‍ വരച്ചുചേര്‍ക്കൂ
    മതിവരാത്ത ദാഹങ്ങളുടെ
    ഒരു റീത്ത്‌"

    :(

    ഇതായി ഇപ്പോഴത്തെ അവസ്ഥ...

    ReplyDelete
  3. നഷ്ടമാകുന്ന പുഴ..മനുഷ്യന്റെ സുഖത്തിനായി ഭൂമിയിലുള്ള എന്തും എങ്ങനെയും ഉപയോഗിക്കാം എന്ന തത്വം മാറാതെ ഒന്നിനും മാറ്റം ഉണ്ടാവില്ല.നമ്മളെ പോലെ തന്നെ ഉറുമ്പിനും കാക്കയ്ക്കും ഒക്കെ ഇവിടെ ജീവിക്കണം.മരങ്ങളും പുഴകളും ഒക്കെ വേണം..വീണ്ടും വീണ്ടും ആര്‍ത്തിയോടെ കൂട്ടി വയ്ക്കുന്ന പണം..അതിനു വേണ്ടിയുള്ള പാച്ചിലിനു ഇടയില്‍ ആര്‍ക്കൊക്കെ മുറിവേറ്റു,ആരൊക്കെ മരിച്ചു വീണു..നാം അറിയുന്നതേയില്ല..

    ReplyDelete
  4. നല്ല കവിത.

    ReplyDelete
  5. പോക്കുവെയിലിന്റെ മിന്നുന്ന ഉടയാടയിട്ട്, പരല്‍മീനിന്റെ ഏലസ്സണിഞ്ഞ്, കുറുമ്പു കാട്ടികൊണ്ട് കുലുങ്ങി ചിരിച്ചു കൊണ്ടൊഴുകുന്ന പുഴ ഓര്‍മ്മയില്‍ മാത്രമാകാന്‍ ഇനി അധികം കാലമില്ല.

    നശിച്ചു കൊണ്ടിരിക്കുന്ന ഒരു പുഴയുടെ ചിത്രം കവിതയിലൂടെ ഭംഗിയായി വരച്ചു കാട്ടി. ചിത്രത്തോടൊപ്പം ആശയത്തിന്റെ തീവ്രതയും വായനക്കാരില്‍ എത്തിക്കാന്‍ കഴിഞ്ഞു. പുഴയുടെ ചരമഗീതം ഗംഭീരമായി.

    ReplyDelete

Post a Comment

Popular posts from this blog

ആരാണ് രക്തസാക്ഷി?

പ്രണയം വിപ്ലവമാണ്

സ്നേഹം എന്നാല്‍ എന്താണ്?