കണ്ടെത്താത്ത വിലാസം



കവി അയ്യപ്പന്റെ ഓർമ്മയിൽ മലയാള കവിതയുടെ ഒരു ദിവസം

ഷാർജ ഇന്ത്യൻ അസോസിയേഷൻ ഹാളിൽ

ഫെബ്രുവരി 4, വെള്ളിയാഴ്ച കാലത്ത് 10 മണി മുതൽ രാത്രി 10 മണി വരെ

സാഹിത്യത്തിന്‌ മനുഷ്യജീവിതത്തിൽനിന്ന്‌ വേറിട്ട് സ്വതന്ത്രവും, യാന്ത്രികവുമായ ഒരു അസ്തിത്വവുമില്ലെന്ന തിരിച്ചറിവായിരുന്നു പുരോഗമന സാഹിത്യത്തിന്റെയും അതിന്റെ വക്താക്കളുടെയും കാതൽ. ആഗോളതലത്തിൽ തന്നെ നിശിതമായ വിമർശനങ്ങളായിരുന്നു ആ വാദത്തിന്‌ നേരിടേണ്ടിവന്നത്. ഉത്തരാധുനികതയുടെ ഈ കാലത്തും ജീവത്സാഹിത്യം വിവിധ കോണുകളിൽനിന്ന് നിരന്തരമായ ആക്രമണങ്ങൾക്ക് വിധേയമായിക്കൊണ്ടിരിക്കുന്നു എന്നു കാണാം.
സാഹിത്യമടക്കമുള്ള കലകളെ സാമാന്യമനുഷ്യന്റെ ജീവിതാവിഷ്ക്കാരത്തിൽനിന്ന് അകറ്റുക വഴി, ഒരു വരേണ്യവർഗ്ഗത്തിന്റെ കൈപ്പിടിയിലൊതുക്കുക എന്ന ലക്ഷ്യമാണ്‌ കല കലയ്ക്കു വേണ്ടി എന്ന വാദത്തിന്റെ അണിയറയിലും അടിത്തറയ്‌ലും പ്രവർത്തിക്കുന്ന ചാലകശക്തി.
ഈയൊരു പശ്ചാത്തലത്തിൽ വേണം ഏറെ കൊട്ടിഘോഷിക്കപ്പെട്ടുകൊണ്ട് മുഖ്യധാരയിൽ നടത്തപ്പെടുന്ന സാഹിത്യ ചർച്ചകളെയും പ്രവർത്തനങ്ങളെയും ഇന്നു നമ്മൾ വിലയിരുത്തേണ്ടത്. പ്രേരണ ഉദ്ദേശിക്കുന്നതും മറ്റൊന്നല്ല.
നിലവിലുള്ള സാഹിത്യചർച്ചകളുടെയും സംവാദങ്ങളുടെയും അരങ്ങുകളുടെയും മുഖ്യധാരയിൽനിന്നകന്ന്, മനുഷ്യനെയും അവന്റെ സാമൂഹികതയെയും സമഗ്രമായി ആശ്ളേഷിക്കുന്ന സമഗ്രമായ ഒരു സാഹിത്യദർശനത്തെയാണ്‌ പ്രേരണ സാക്ഷാത്ക്കരിക്കാൻ ശ്രമിക്കുന്നത്. സാഹിത്യത്തെ ഈയൊരു ലക്ഷ്യത്തിലേക്കുവേണ്ടി ഉപയോഗിക്കുന്ന ചില ന്യൂനപക്ഷങ്ങൾ നമുക്കിടയിലുണ്ടെങ്കിലും, അവയെയെല്ലാം സമർത്ഥമായി തിരസ്ക്കരിക്കാൻ പ്രതിജ്ഞാബദ്ധമായ മുഖ്യധാരാ സാഹിത്യ പ്രസ്ഥാനങ്ങളും, വക്താക്കളുമാണ്‌ ഇന്ന് അരങ്ങു വാഴുന്നത്.
വരേണ്യവർഗ്ഗത്തിന്റെ പുരസ്ക്കാരങ്ങളുടെ പത്മപ്രഭയിൽനിന്നും പൊന്നാടകളിൽനിന്നും തെരുവിലെ സാധാരണക്കാരന്റെ വേഷഭൂഷകളിലേക്ക് കലയെയും സാഹിത്യത്തെയും ഇറക്കി പ്രതിഷ്ഠിക്കുകയും, കലയെയും സാഹിത്യത്തെയും മതേതരവും, അധിനിവേശവിരുദ്ധവും സമത്വത്തിലധിഷ്ഠിതവുമായ ഒരു സമഗ്രമായ ജീവിതദർശനമാക്കുകയും വേണം. അതോടൊപ്പം തന്നെ കലയുടെയും കവിതയടക്കമുള്ള സാഹിത്യ രൂപങ്ങളുടെയും നൈതികതയെയും നമ്മൾ അഭിസംബോധന ചെയ്യേണ്ടിയിരിക്കുന്നു. മലയാളിഭാവന അതിജീവിക്കേണ്ട ആസന്നതകളെപ്പറ്റിയും അത് പറഞ്ഞുതരും

ആ ദൌത്യം അത്ര എളുപ്പമല്ല. നടന്നുതീർക്കേണ്ട വഴികൾ അതിദീർഘമാണ്‌. നഷ്ടപ്പെട്ട മേൽവിലാസങ്ങളിൽ കുരുങ്ങിക്കിടക്കാൻ ഒരു നാട്ടിലെയും ഒരു കലാസാഹിത്യ ദർശനങ്ങൾക്കും ഏറെക്കാലം സാധ്യമല്ല. യഥാർത്ഥത്തിൽ നമുക്ക് നമ്മുടെ മേൽവിലാസങ്ങൾ നഷ്ടപ്പെടുകയല്ല, അത് നമ്മിൽ നിന്നും കവർച്ചചെയ്യപ്പെടുകയാണുണ്ടായത്. മേൽവിലാസങ്ങൾ തിരിച്ചുപിടിക്കുക എന്നതിന്റെ അര്‍ത്ഥം എന്നത് നമ്മുടെ നൈതികതയെ തിരിച്ചുപിടിക്കുക എന്ന് തന്നെയാണ്.
മലയാളത്തിൽ കവിതയുടെ ചരിത്രവും നൈതികതയുടെ ചരിത്രവും അത്രമേൽ ഇഴ ചേര്‍ന്നു കിടക്കുന്നു .ശ്രീനാരായണൻ അരുവിപ്പുറത്ത് പ്രതിഷ്ഠ നടത്തുമ്പോള്‍ത്തന്നെ “ജാ‍തിഭേദം മതദ്വേഷം/ ഏതുമില്ലാതെ സര്‍വ്വരും/സോദരത്വേന വാഴുന്ന /മാതൃകാസ്ഥനമാണിത്” എന്ന് കവിതയും കുറിക്കുന്നുണ്ട്. അതിനാല്‍ത്തന്നെ കവിത ചര്‍ച്ചാവിഷയമാകുമ്പോ നൈതികതയും ചര്‍ച്ചാവിഷയമായിത്തീരുന്നു.
കവിതയിൽ അയ്യപ്പനിലേക്കും, നാടകത്തിൽ പി.എം.താജിലേക്കും, സിനിമയിൽ ജോൺ എബ്രഹാമിലേക്കും അവർക്കുമപ്പുറത്തേക്കും ചെന്ന്‌ നമുക്ക് നമുടെ സാഹിത്യ കലാ ദർശനങ്ങളുടെ മേൽവിലാസങ്ങളും, നൈതികതയും തിരിച്ചുപിടിക്കേണ്ടതുണ്ട്.
അതിനുള്ള ഒരു എളിയ ചുവടുവെയ്പാണ്‌ ഫെബ്രുവരി 4-ന്‌ ഷാർജ ഇന്ത്യൻ അസ്സോസ്സിയേഷനിൽ പ്രേരണ സംഘടിപ്പിക്കുന്ന ഏകദിന സാഹിത്യസമ്മേളനം.
‘കണ്ടെത്താത്ത വിലാസം’ എന്ന പ്രമേയം അടിസ്ഥാനമാക്കിയ സാഹിത്യ സമ്മേളനത്തിന്റെ ആദ്യഭാഗത്ത് മൂന്ന് പഠനങ്ങളാണ്‌ ഉദ്ദേശിച്ചിട്ടുള്ളത്.


പ്രബന്ധാവതരണവും ചർച്ചയും
1. ‘സമകാലീന മലയാള കവിതയും മലയാള ജനതയുടെ നൈതികതയും’ - പി.എൻ.ഗോപീകൃഷ്ണൻ
2. ‘കുടിയേറ്റരാഷ്ട്രീയം മലയാളകവിതയിൽ‘ - സർജു
3.അരാജകവാദത്തിന്റെ ജൈവരസതന്ത്രവും രാഷ്ട്രീയവും‘- ഡോ.അബ്ദുൽ ഖാദർ
രണ്ടാം ഘട്ടം
സമർപണം അയ്യപ്പന്
അയ്യപ്പൻ അനുസ്മരണ പ്രഭാഷണം
അയ്യപ്പന്റെ കവിതകളുടെയും അയ്യപ്പനെകുറിച്ചുള്ള കവിതകളുടെയും ചൊല്ലി അവതരണം
മൂന്നാം ഘട്ടം
സിനിമാ പ്രദർശനം
‘ആന്റോണിം ആർടോഡിന്റെ കൂടെ എന്റെ ജീവിതവും കാലവും‘
- ജെറാൾഡ് മോർഡിലാറ്റ്

ഫ്രഞ്ച് കവിയും നാടകപ്രവർത്തകനുമായ ആന്റോണിം ആർടോഡിന്റെ ജീവിതത്തെ ആസ്പദമാക്കിയുള്ള സിനിമ
കൂടുതൽ വിവരങ്ങൾക്ക് അനൂപ് ചന്ദ്രൻ (050 5595790), പ്രദോഷ്കുമാർ (050 590 5862) എന്നിവരെ ബന്ധപ്പെടുക.
എബ്രഹാം പി ജോസഫ് (ചെയർമാൻ, സ്വാഗതസംഘം)
പ്രദോഷ്കുമാർ (ജന. കൻവീനർ, സ്വാഗതസംഘം )
അനൂപ് ചന്ദ്രൻ (കൻവീനർ, പ്രോഗ്രാം കമ്മറ്റി )

Comments

  1. പരിപാടിക്ക് ആശംസകള്‍ :)

    ReplyDelete
  2. പരിപാടിക്ക് ആശംസകള്‍ അർപ്പിക്കുന്നതോടൊപ്പൊം,അയ്യപ്പന്റെ ഓർമ്മകൾക്കു മുന്നിൽ ആദരാഞ്ജലികളും.

    ReplyDelete
  3. ഭാനൂ, ആശംസകൾ, ഗോപീകൃഷ്ണൻ കവിതയെക്കുറിച്ച് എന്തു പറഞ്ഞു എന്ന് ഏതിലെങ്കിലും ഒന്നു പ്രസിദ്ധീകരിക്കുമോ?

    ReplyDelete
  4. ഒരു ടിക്കറ്റ്‌ അയച്ചു തരൂ മാഷേ.. :)

    ReplyDelete
  5. മാഷേ, എല്ലാവിധ ആശംസകളും.
    കവിതയിൽ അയ്യപ്പനിലേക്കും, നാടകത്തിൽ പി.എം.താജിലേക്കും, സിനിമയിൽ ജോൺ എബ്രഹാമിലേക്കും അവർക്കുമപ്പുറത്തേക്കും ചെന്ന്‌ നമുക്ക് നമുടെ സാഹിത്യ കലാ ദർശനങ്ങളുടെ മേൽവിലാസങ്ങളും, നൈതികതയും തിരിച്ചു പിടിക്കാനാവും.

    ReplyDelete
  6. @ ശ്രീ മാഷ് . തീര്‍ച്ചയായും സെമിനാറില്‍ സംസാരിക്കുന്ന വിഷയങ്ങള്‍ ഞാന്‍ ഗൌരവമായി തന്നെ പോസ്റ്റ്‌ ആക്കാന്‍ ഉദ്ദേശിക്കുന്നു. അത് നമ്മുടെ സുഹൃത്തുക്കള്‍ക്ക് ഗുണം ചെയ്യുമല്ലോ.

    ReplyDelete
  7. ഞാന്‍ പിണക്കമാണ്.. ഇതോടൊപ്പം എനിക്ക് വിസയും റ്റിക്കറ്റും അയക്കാത്തതില്‍

    ReplyDelete
  8. പിന്നെ പരുപാടി മംഗളമായി നടത്തുവാന്‍ സാധിക്കട്ടെ എന്ന് ജഗതീശ്വരനോട് പ്രാര്‍ഥിക്കാം. ഒപ്പം എന്‍റെ ആശംസയും

    ReplyDelete
  9. എല്ലാം മംഗളമായി നടക്കട്ടെ.

    ReplyDelete
  10. പരിപാടിക്ക് ആശംസകള്‍

    എല്ലാം മംഗളമായി നടക്കട്ടെ...

    ReplyDelete
  11. വിശദമായ വിവരണത്തിന് കാതോർത്ത്...

    ReplyDelete
  12. ഞാൻ ബലിയാടായി തുടരുക തന്നെ ചെയ്യും ആരെങ്കിലും അതാകേണ്ടിയിരിക്കെ എന്ന അയ്യപ്പന്റെ വാക്യം ഓർത്ത് പോകുന്നു. അയ്യപ്പപ്പണിക്കരുടെ ഒരു നിരീക്ഷണം കൂടി പറയട്ടെ അവൻ അയ്യപ്പനല്ല ഹയ്യപ്പനാണ്.(High Appan)അത് തന്നെ ശരി. കാര്യങ്ങൾ ഉഷാറായി നടക്കട്ടെ, ആശംസകൾ

    ReplyDelete
  13. ആശംസകള്‍ .....കൊടുത്താല്‍ വിവരങ്ങള്‍ പ്രതീക്ഷിക്കാം അല്ലെ ...

    ReplyDelete
  14. :)
    ആശംസകള്‍
    ഒരു വിസേം ടിക്കറ്റും കൂടി കിട്ടീരുന്നേല്‍...

    ReplyDelete

Post a Comment

Popular posts from this blog

പ്രണയം വിപ്ലവമാണ്

ആരാണ് രക്തസാക്ഷി?

സ്നേഹം എന്നാല്‍ എന്താണ്?