ഗദ്ദര്‍



നഗരത്തിന്റെ സായാഹ്ന കൂടിച്ചേരലില്‍
പെറ്റിബൂര്‍ഷ്വാ വായാടികള്‍ക്ക്
വിപ്ലവകവിത പകര്‍ന്ന്
ചിരിച്ചുന്മത്തനായി
മറ്റൊരു സായാഹ്നത്തിലേയ്ക്ക്
തിരിച്ചു പോകാന്‍
വന്നവനല്ല അവന്‍.

നെഞ്ചിലേറ്റ വെണ്ടിയുണ്ടകളുമായി,
കാട്ടുചെണ്ടയുടെ ക്രൗര്യവുമായി
തെലുഗുപാടങ്ങളില്‍ നിന്ന്‌ നരച്ച താടിയുമായി വന്നത്
ഞാന്‍ ഇവിടെയുണ്ട് എന്ന് അലറുവാന്‍...

എന്റെ കവിത
മാമ്പൂവുകളുടെ നഷ്ടത്തെ കുറിച്ചും
കെട്ടുപോയ പ്രണയങ്ങളെ കുറിച്ചും
വിലപിക്കില്ലെന്നു പ്രഖ്യാപിക്കുവാന്‍...

അവന്റെ കവിത
പാല്‍ നിറമെന്തന്നറിയാത്ത
ഇടയബാലനെ കുറിച്ചും
കൊയ്‌ത്തു കഴിഞ്ഞ ഗോതമ്പു പാടത്ത്‌
വിശന്നു മരിച്ച കര്‍ഷകനെ കുറിച്ചും പാടും.

അവന്റെ കവിത
കാടുകള്‍ നഷ്ടപ്പെട്ട ആദിവാസിയുടെ
ദുരിതങ്ങള്‍ പങ്കുവെയ്ക്കും.
പോരാട്ടത്തില്‍ കൊല്ലപ്പെട്ട
വിപ്ലവ ധീരന്റെ
ചുവന്ന രക്തസാക്ഷിത്വത്തെ കുറിച്ചു പാടും.

ഡമരുവിന്റെ താളത്തില്‍
അര്‍ദ്ധനഗ്നന്റെ നൃത്തച്ചുവടുകള്‍
നഗരത്തെ
കവിതയുടെ ഉന്മാദത്തിലേയ്ക്ക് ഉണര്‍ത്തും.

വെടിയുണ്ടകളെ കീഴ്പ്പെടുത്തി
അവന്‍ വന്നത്
നിങ്ങളുടെ ബൌദ്ധീക വാചാലതകളില്‍
ഉത്തരാധുനികതയുടെ ശ്രേഷ്ഠത പുലമ്പുവാനല്ല.

ഗോദാവരിയുടെ തീരങ്ങളില്‍,
തെലുങ്കാനയില്‍
രക്തം ചൊരിഞ്ഞ ധീരരുടെ
അണയാത്ത കണ്ണുകളെ കുറിച്ച് പാടുവാന്‍.

മനുഷ്യര്‍ പട്ടിണി കിടക്കുന്ന കാലത്തോളം
പോരാട്ടം തുടരുക തന്നെ ചെയ്യുമെന്നും
ചരിത്രം അവസാനിക്കുകയല്ല
തുടങ്ങിയതേയുള്ളൂ എന്നും
ഓര്‍മ്മിപ്പിക്കുവാന്‍..

Comments

  1. ശ്വാനവര്‍ഷങ്ങള്‍ തേര്‍വാഴ്ച നടത്തുമ്പോഴും ഒരു കവി നെഞ്ചില്‍ വെടിയുണ്ടയും സ്വപ്നങ്ങളുമായി ഇവിടെ ജീവിച്ചിരിക്കുന്നു. ജനകോടികളെ ഇളക്കി മറിക്കുന്നു.
    മുംബയില്‍ ഗദ്ദറുമായി പങ്കുവച്ച ആ സായാഹ്നത്തിന്റെ ഓര്‍മ്മയില്‍ ...

    ReplyDelete
  2. കൊയ്‌ത്തു കഴിഞ്ഞ ഗോതമ്പു പാടത്ത്‌
    വിശന്നു മരിച്ച കര്‍ഷകനെ കുറിച്ചു പാടും.
    കവിത നമ്മെ മാനുഷികതയെപറ്റി ഓര്‍മ്മപ്പെടുത്തുന്ന ഉണര്‍ത്തുപാട്ടാകട്ടെ.

    ReplyDelete
  3. "മനുഷ്യര്‍ പട്ടിണി കിടക്കുന്ന കാലത്തോളം
    പോരാട്ടം തുടരുക തന്നെ ചെയ്യുമെന്നും
    ചരിത്രം അവസാനിക്കുകയല്ല
    തുടങ്ങിയതേയുള്ളൂ എന്നും
    ഓര്‍മ്മിപ്പിക്കുവാന്‍.."

    പോരാട്ട വീര്യമുള്ള ഒരു കവിത...
    ഒരു കവി മാത്രമല്ല എത്രയോ എഴുത്തുകാര്‍ നെഞ്ചില്‍ വെടിയുണ്ടയും സ്വപ്നങ്ങളുമായി ഇവിടെ ജീവിച്ചിരിക്കുന്നു...ചരിത്രം ആവര്‍ത്തിക്കപ്പെടട്ടെ...എഴുത്തുകാരന്റെ പോരാട്ടവീര്യം അമ്മയുടെ ഗര്‍ഭപാത്രത്തില്‍ നിന്നേ തുടങ്ങട്ടെ,,,
    ഭാനു ആശംസകള്‍..നന്നായി പറഞ്ഞിരിക്കുന്നു...

    ReplyDelete
  4. @ മഹേഷ്‌,
    അദ്ദേഹത്തിന്റെ നെഞ്ചില്‍ വെടിയുണ്ട ഉണ്ട് എന്നത് ഒരു കാവ്യ ഭാവനയല്ല ട്ടോ. ശരിക്കും ഒരു വധ ശ്രമത്തില്‍ നിന്നും അത്ഭുതകരമായി രക്ഷപ്പെട്ട്, ഇപ്പോഴും നീക്കം ചെയ്യാനാവാതെ വെടിയുണ്ടകള്‍ നെഞ്ചില്‍ കൊണ്ടു നടക്കുന്നു.

    ReplyDelete
  5. വിപ്ലവാത്മകമായ കവിത...കൊഴിഞ്ഞു വീണ മാമ്പൂക്കളേയും നഷ്ടമായ പ്രണയത്തേയും പറ്റി വിലപിക്കാതെ വെടിയുണ്ടകൾ നെഞ്ചേറ്റി വിപ്ലവ ചിന്തകൾ പകർന്ന കവി...

    ReplyDelete
  6. മനുഷ്യര്‍ പട്ടിണി കിടക്കുന്ന കാലത്തോളം
    പോരാട്ടം തുടരുക തന്നെ ചെയ്യുമെന്നും
    ചരിത്രം അവസാനിക്കുകയല്ല
    തുടങ്ങിയതേയുള്ളൂ എന്നും
    ഓര്‍മ്മിപ്പിക്കുവാന്‍..
    good.

    ReplyDelete
  7. കവിതയിലൂടെ ഒരു ജീവിതം പരിചയപ്പെടുത്തിയപ്പോള്‍ വരികളില്‍ ചോരപുരണ്ട സത്യങ്ങള്‍

    ReplyDelete
  8. അതെ. ഈ കാലത്തെ കൂടി കൂട്ടി വായിക്കുംപോഴാണ് ഗദ്ദർ എത്ര പ്രാധാന്യം അർഹിക്കുന്നെന്ന് മനസ്സിലാകുന്നത്. ശ്വാനവർഷങ്ങൾ ആയ പൊതു സ്വീകാര്യതയെ നെറുകിൽ വെട്ടിയുരുത്തിരിയുന്ന പാട്ടുകൾ...വിപ്ലവ ബോധത്തിന്റെ വറ്റാത്ത നീരുറവകൾ നമ്മെ പോരാടാൻ അല്ലെങ്കിൽ നമ്മെ നാമാക്കി നിർത്താനെങ്കിലും പ്രേരിപ്പിക്കുന്നവയാണ്.

    ReplyDelete
  9. തീഷ്ണമായ കവിത. ആശംസകള്‍

    ReplyDelete
  10. വെടിയുണ്ടകളെ കീഴ്പ്പെടുത്തി അവന്‍ വന്നത്
    നിങ്ങളുടെ ബൌദ്ധീക വാചലതകളില്‍
    ഉത്തരാധുനികതയുടെ ശ്രേഷ്ഠത പുലമ്പുവാനല്ല.
    ഞരമ്പുകളില്‍ പോരാട്ടത്തിന്റെ ജീവവായു പകരാന്‍‍.

    ReplyDelete
  11. പ്രണയ ഗീതങ്ങള്‍ നിര്‍ത്തി വിപ്ലവ കവിതയിലേക്ക് നടുന്നു കയറുന്നു ബാനു ..
    ശരിക്കും രോമാഞ്ഞമുണ്ടാവുന്നു ബാനു.......അറിയാതെ സിരകളില്‍ പഴയ വിവ്പ്ളവ ആവേശം നുരഞ്ഞു പോന്തുന്നു...
    ഈ കവിത ഏറ്റു പാടുവാന്‍ തിളക്കുന്നു ചോര ..............നന്ദി ബാനു

    ReplyDelete
  12. ഗദ്ദർ കവിത ഗംഭീരമായി. ഗദ്ദറിനേയും ശ്രീശ്രീയേയും പോലുള്ള പോരാട്ടവും കലയും ഒന്നുതന്നെയായിരുന്ന കവികൾ ഒരു കാലത്തും മലയാളത്തിലുണ്ടായിരുന്നില്ല എന്നു തോന്നുന്നു, അടിയന്തിരാവസ്ഥയുമായി ബന്ധപ്പെട്ട് ചില നാമ്പുകൾ പ്രത്യക്ഷപ്പെട്ടെ ങ്കിലും പിന്നീടത് ഒരു മൃദു ഇടത് അക്കദമിക് എക്സർസൈസിലേക്ക് വഴുതി വീണു.

    ReplyDelete
  13. ഗദ്ദരിനെക്കുരിച്ചുള്ള കവിത തീ തുപ്പുന്നത് തന്നെ.അതങ്ങിനെ ആകാനെ തരമുള്ളൂ.ഇന്ന് നമ്മുടെ രാജ്യത്ത് ജീവിച്ചിരിക്കുന്ന ചുരുക്കം ആണുങ്ങളില്‍ മുമ്പനാണ് ഗദ്ദര്‍.വിപ്ലവാശംസകള്‍.

    ReplyDelete
  14. വിപ്ലാവാവേശം സിരകളില്‍ പടര്‍ത്തുന്ന കവിത നന്നായി ഭാനൂ...

    ReplyDelete
  15. അതെ കവികള്‍ രുദിതാനുസാരികള്‍ തന്നെ,
    അവരെ മാത്രമേ കവികള്‍ എന്ന് വിളിക്കാവൂ.........
    പ്രണയത്തിലെ കണ്ണീരായലും പട്ടിണിയുടെ കണ്ണീരായലും
    ആ ഒറ്റചിലങ്ക പാടുന്നത് പലരും ഓര്‍ക്കാന്‍ പോലും ഇഷ്ടപ്പെടാത്തത്.
    .................നന്ദി കവിതക്ക്

    ReplyDelete
  16. മനുഷ്യര്‍ പട്ടിണി കിടക്കുന്ന കാലത്തോളം
    പോരാട്ടം തുടരുക തന്നെ ചെയ്യുമെന്നും
    ചരിത്രം അവസാനിക്കുകയല്ല
    തുടങ്ങിയതേയുള്ളൂ എന്നും
    ഓര്‍മ്മിപ്പിക്കുവാന്‍..

    വിപ്ലവാവേശം ഭാനുവേട്ടന്റെ എല്ലാ കവിതകളിലും നിറഞ്ഞു നിൽക്കുന്നതായി കണ്ടിട്ടുണ്ട്. ഇതിലും. അഭിവാദ്യങ്ങൾ.

    ReplyDelete
  17. കവിത നന്നായിരിക്കുന്നു. വിരഹവും, കാത്തിരിപ്പുമില്ലാത്ത കവിത കണ്ടിട്ട് ഇച്ചിരി ആയി :)

    എന്റെ കവിത
    മാമ്പൂവുകളുടെ നഷ്ടത്തെ കുറിച്ചും
    കെട്ടുപോയ പ്രണയങ്ങളെ കുറിച്ചും
    വിലപിക്കില്ലെന്നു പ്രഖ്യാപിക്കുവാന്‍...

    ReplyDelete
  18. ഗദ്ദറിനെ കുറിച്ച് കവി കുരീപ്പുഴയുടെ ചില വാക്കുകള്‍ കഴിഞ്ഞ ദിവസം വര്‍ത്തമാനത്തില്‍ വായിച്ചതേ ഉള്ളൂ. നന്നായി ഭാനൂ ഈ സമര്‍പ്പണം. ഭാനുവിന്റെ കവിതകളിലെ വിപ്ലവം പുതിയ ഒരു കാലഘട്ടത്തിന്റെ കവിതകള്‍ക്കായുള്ള ഒരു വിപ്ലവമാവട്ടെ.

    ReplyDelete
  19. പല്ലും നഖവും കൊഴിഞ്ഞ വിപ്ലവാവേശങ്ങൾക്കിടയിൽ ഒരേറ്റുപറച്ചിലായി...പതം പറഞ്ഞ് കരയുന്നു.....
    :)))

    ReplyDelete
  20. മനുഷ്യര്‍ പട്ടിണി കിടക്കുന്ന കാലത്തോളം
    പോരാട്ടം തുടരുക തന്നെ ചെയ്യുമെന്നും
    ചരിത്രം അവസാനിക്കുകയല്ല
    തുടങ്ങിയതേയുള്ളൂ എന്നും
    ഓര്‍മ്മിപ്പിക്കുവാൻ...

    ReplyDelete
  21. എല്ലാവരും പറഞ്ഞു. ഇനി ഞാനെന്ത് പറയാൻ?

    ReplyDelete
  22. "വെടിയുണ്ടകളെ കീഴ്പ്പെടുത്തി
    അവന്‍ വന്നത്ചരിത്രം അവസാനിക്കുകയല്ല
    തുടങ്ങിയതേയുള്ളൂ എന്നും
    ഓര്‍മ്മിപ്പിക്കുവാന്‍.."

    വാക്കുകള്‍ക്ക് തീ പിടിക്കുന്നു..വിപ്ലവത്തിന്റെ വെടിയുണ്ട ഹൃദയത്തിലും മനസ്സിലും പേറുന്ന കവി ഗദ്ദറിനെ കുറിച്ചെഴുതിയ ഈ കവിത ആവേശം ഉണര്‍ത്തുന്നു. അഭിവാദ്യങ്ങള്‍.

    നല്ലൊരു കവിത സമ്മാനിച്ചതിന്‌ നന്ദി.

    ReplyDelete
  23. അതെ, ഇങ്ങനെയും ചിലർ.....
    കവിത നന്നായി ഭാനു, ചില വരികൾ പ്രത്യേകിച്ചും...
    വല്ലാതെ നിരാശ തോന്നുമ്പോൾ ഇത്തരം വരികൾ പിന്നെയും ജീവിപ്പിയ്ക്കും...

    ReplyDelete
  24. പാല്‍ നിറം എന്തെന്ന് അറിയാത്ത ഇടയ
    ബാലന്‍ ..കൊയ്ത്തു കഴിഞ്ഞ ഗോതമ്പ്
    പാടത്ത് വിശന്നു മരിച്ചു വീണ കൊയ്തുകാരന്‍
    ആവും അല്ലെ ആ കര്‍ഷകനും ...നെഞ്ചില്‍
    തറച്ചു ഇരിക്കുന്ന ആ വെടിയുണ്ട പോലെ
    വേദനിപ്പിക്കുന്നു ..നിരന്തരം ..
    .നല്ല കവിത ഭാനു ...

    ReplyDelete
  25. http://whitelineworld.com/group/puthukavithakal?xg_source=activity
    i have posted your poem without your permission please join and see there
    your a good writter let people of mumbai malayali's to knew about
    keep in touch with

    ReplyDelete
  26. സഫ്ദര്‍ ഹഷ്മിയുടെ ഊറ്റം
    കൂടു വിട്ടു കൂടൊരുക്കിതയാളില്‍
    കവിതകളില്‍ വിപ്ലവത്തിന്റെ
    വിയര്‍പ്പു ഗന്ധവുമായി
    അവന്‍ വന്നതു്
    ആദിവാസിയെന്നും,ദളിതനെന്നും
    ചാപ്പ കുത്തി മാറ്റി നിര്‍ത്തിയ
    അടിമകളെ മോചിപ്പിക്കാന്‍
    പട്ടിണിയെ നൂറു കോടിശ്വരന്മാ -
    രുടെ കണക്കു കണ്ണുരുട്ടി
    പേടിപ്പിക്കുന്ന ഭീരുക്കളുടെ നട്ടില്‍
    നട്ടെല്ലുറപ്പുള്ള പോരളിയിയാള്‍ .
    ഭാനു തീപിടിപ്പിക്കുന്ന കവിതക്കു അഭിനന്ദനങ്ങള്‍

    ReplyDelete
  27. തീ പിടിപ്പിക്കുന്ന വരികള്‍, സഫ്ദര്‍ ഹാശ്മിയെ ഓര്‍ത്തു പോയ്.


    ഈ കവിത എനിക്കറിയാവുന്നവര്‍ക്ക് ഒന്നു പരിചയപ്പെടുത്തുന്നതില്‍ തെറ്റില്ലല്ലോ?

    ReplyDelete
  28. പതിവുശൈലി വിട്ട്‌ തീകൊണ്ടുള്ള ഈ വരികൾ ജോർ.കൂടെ മറ്റുപലരും ഏറ്റുപാടുമ്പോലെ.

    ReplyDelete
  29. പ്രണയങ്ങളെക്കുറിച്ചും പ്രണയത്തടവുകാരെക്കുറിച്ചുമുള്ള കേവലവിലാപമല്ല കവിത എന്ന് തിരിച്ചറിയാൻ ഗദ്ദർ ഒരു നിമിത്തമാകട്ടെ എന്ന് പ്രത്യാശിക്കുന്നു.

    അഭിവാദ്യങ്ങളോടെ,

    ReplyDelete
  30. രാജീവ്‌ ശരിക്കും കുത്തി ട്ടോ. ഞാന്‍ എല്ലാ വിഷയത്തിലും എഴുതിയിട്ടുണ്ട്. പ്രണയ കവിതകളും ഉണ്ട്. പ്രണയ കവിതകളില്‍ ഞാന്‍ വിലാപം നിറക്കാറില്ല. എന്റെ പ്രണയ കവിതകളില്‍ അപ്രാപ്യമായ ഒരു സ്നേഹം ആണ്. അങ്ങനെ ആരെങ്കിലും പ്രണയിക്കുന്നുണ്ടോ എന്നു എനിക്ക് അറിഞ്ഞുകൂടാ. എല്ലാവരും പ്രണയിക്കുന്ന ഒരു ലോകം, പ്രണയം നിറഞ്ഞ ഒരു ലോകം അതും വിപ്ലവകരമായ ഒരു സ്വപ്നമല്ലേ? എന്റെ പ്രണയ കവിതകള്‍ വായിച്ചു പലരും അഭിപ്രായപ്പെട്ടത് ഇത് ഉട്ടോപ്യന്‍ ആണ് എന്നാണ്.

    ReplyDelete
  31. ഞാന്‍ ഇവിടെയുണ്ട് എന്ന് അലറുവാന്‍...,,
    ....’അറിയുന്നു ഞാൻ കവിതയിലൂടെ’,,,

    ReplyDelete
  32. പട്ടിണിയാണ് ഇന്നും എല്ലാ വിപ്ലവചിന്തകള്‍ക്കും മുകളില്‍. ആഹാരത്തിനു വേണ്ടി ആയുധമെടുത്തവരാണ് ഇവിടെ അധികവും. ഇവരൊക്കെ കമ്യൂണിസ്റ്റുകള്‍ തന്നെയാണ്. അനീതിയ്ക്ക് വേണ്ടി ശബ്ദമുയര്‍ത്തുമ്പോള്‍, അതിനുവേണ്ടി മറ്റുള്ളവരെ പഠിപ്പിപ്പിക്കുമ്പോള്‍ അറിയാതെ കമ്യൂണിസ്റ്റായിപ്പോകുന്നു..അല്ലെങ്കില്‍ മാവോയിസ്റ്റുകളാകുന്നു...അതുമല്ലെങ്കില്‍ നക്സല്‍. ..!



    സ്നേഹപൂര്‍വ്വം

    ReplyDelete
  33. "അവന്റെ കവിത പാല്‍ നിറമെന്തന്നറിയാത്ത
    ഇടയബാലനെ കുറിച്ചും
    കൊയ്‌ത്തു കഴിഞ്ഞ ഗോതമ്പു പാടത്ത്‌
    വിശന്നു മരിച്ച കര്‍ഷകനെ കുറിച്ചും പാടും....."

    അഭിവാദ്യങ്ങള്‍...!

    ReplyDelete
  34. ഒരു നല്ല കവിത വായിച്ചു.സംതൃപ്തിയോടെ.

    ReplyDelete
  35. എന്‍റെ അറിവും വായനയും എത്ര കുറവാണെന്ന് ഞാന്‍ പലപ്പോളും അറിയുന്നത് ഇവിടെ നിന്നാണ്.പലതും അറിയാനും പഠിക്കാനും ഉണ്ടാവും ഇവിടുത്തെ വരികളില്‍.പ്രണയവും വിപ്ലവവും എല്ലാം മുന്‍പൊരിക്കലും കേള്‍ക്കാത്ത ഭാവത്തില്‍ ഇവിടെ കാണുന്നു..

    ReplyDelete
  36. ഗദറെന്ന വിപ്ലവകാരിയെ തൊട്ടറിഞ്ഞ കവിത. അഭിനന്ദനങ്ങള്‍

    ReplyDelete
  37. നല്ല കവിതക്കെന്റെ വിപ്ലവാഭിവാദനങ്ങൾ........

    ReplyDelete
  38. @Sabu M H said... "വീഡിയോയിൽ കണ്ട കവിയുടെ വയറും, വണ്ണവും വിപ്ലവ ചിന്തകളുമായി ഒത്തു പോകുന്നില്ല വിശന്നു മരിച്ച കർഷകനേ കുറിച്ച്‌ ഒരു പൊണ്ണത്തടിയൻ പാടിയാൽ എങ്ങനെ ഇരിക്കും"

    സാബുവിനെ പോലെ വിവരമുള്ള ആളുകള്‍ ലോകം അറിയപ്പെടുന്ന വിപ്ലവ കവിയും ജനകീയനും ആയ ഗദ്ദറിനെ "പൊണ്ണതടിയനെന്ന്" പറയുന്നത് കേള്‍ക്കുമ്പോള്‍ വിഷമം തോന്നുന്നു. അദ്ദേഹത്തെ കുറിച്ച് കൂടുതല്‍ മനസ്സിലാക്കിയാല്‍ ഒരിക്കലും ഇങ്ങിനെ പറയാന്‍ കഴിയില്ല.

    ReplyDelete
  39. വിപ്ലവാഭിവാദ്യങ്ങൾ...

    ReplyDelete
  40. കവിത നന്നായിട്ടുണ്ട്...

    ReplyDelete
  41. അല്ലേ മാഷേ,ഗദ്ദറിനെ നേരിൽ കണ്ടില്ലായിരുന്നുവെങ്കിലും ഈ ചോരത്തിളപ്പ് നമ്മിലുണ്ടാവുമല്ലോ! ‘ചെഗുവേര’യും ‘ഭഗത് സിങ്ങും’‘ലൂഥർ കിങ്ങു’മൊക്കെ ഇപ്പോഴും മറ്റൊരു പ്രാണനായി ജീവിച്ചിരുപ്പുണ്ട്. ‘വിപ്ലവവീര്യം’തുടിക്കുന്ന നല്ല ധീരത പകരുന്ന കവിത. അഭിനന്ദനങ്ങൾ......

    ReplyDelete
  42. kavitha teekshnamanu.viplavathinte veeryam pakarunnumund.ittaram jeevithangal namukku chuttumundu thanum.pakshe ivarum adhikaram kittiyalinganokke thanneyakum cheyyunntah. rogathe chikilsikkathe karanathe chikilsikan sramikkukayanu iru kootarum.vilpavathinu avvesham mathi.vikasanathinu athu matram pora.areyum kuttapeduthukayalla.chorappadukal onnum nalkilla.paalniramariyathavane rudhira niram kaati kodukkunnathinode eniku yogikkanavunilla.ivide viplavam thonnunnu ennu paranjavarokke oru asamsa cholli pokum.ithelek vannu jeevitham illathakunnath kavithayil paranjirikkunna aajanathayku thanne.ennu nashtangalude kanakku matram parayanullavar.enikku thonniyath paranjanne ullu.aalaysam kaattunna sarkarukalketire jaagratha pularthendatha athyanthapekshithamanu.pakshe raktham kond samadhanam varilla,ithonnum thanne kavithayude maathu kuraykkunnilla,teerthum nalla oru kavitha.

    ReplyDelete
  43. @സുലേഖ said...
    സുലേഖ ചൂണ്ടിക്കാണിച്ച കാര്യങ്ങള്‍ തീര്‍ത്തും ശരി തന്നെ. വിപ്ലവപ്രസ്ഥാനം ഭീകര പ്രസ്ഥാനമല്ല. ഇന്നു ഉത്തരേന്ത്യയില്‍ സംഭവിച്ചുകൊണ്ടിരിക്കുന്ന വിപ്ലവത്തിന്റെ പേരിലുള്ള ഭീകര പ്രവര്‍ത്തനത്തെ ഞാനോ ഗദ്ദറോ അനുകൂലിക്കുന്നുമില്ല. വിപ്ലവം ജനങ്ങളുടെ ഉത്സവം ആണെന്നും ഒരു വിപ്ലവ പാര്‍ട്ടിയും വിപ്ലവത്തിന്റെ കരാറുകാരല്ല എന്നുമുള്ള ലെനിന്റെ ആശയങ്ങളോടാണ് എനിക്ക് താല്പര്യം. അധികാരത്തില്‍ വരുമ്പോള്‍ വിപ്ലവ പ്രസ്ഥാനങ്ങള്‍ ആശയങ്ങള്‍ കൈവെടിയും എന്ന ആരോപണത്തിനു - അങ്ങനെയുള്ള പ്രസ്ഥാനങ്ങള്‍ ഉണ്ടാകാം എന്നെ പറയാന്‍ പറ്റു. അത് ആ പ്രസ്ഥാനങ്ങളുടെ സൈദ്ധാന്തിക പ്രശ്നമാണ്. ഇന്നു ഉത്തരേന്ത്യന്‍ സംസ്ഥാനങ്ങളില്‍ പോലീസും സവര്‍ണ്ണ ഫാസിസ്റ്റുകളുടെ സേനകളും ആദിവാസികളെയും അവര്‍ണ്ണരേയും കൂട്ടക്കുരുതി നടത്തുമ്പോള്‍ സായുധ ചെറുത്തുനില്പല്ലാതെ മറ്റു പോംവഴികള്‍ ഇല്ല എന്നും സുലേഖ മറന്നു പോകരുത്. ദണ്ടകാരണ്യത്തിലെ ധാതു സമ്പത്ത് കൊള്ളയടിക്കുവാന്‍ ആ മേഖലകളിലെ ആദിവാസികളെ ഉന്മൂലനം ചെയ്യാനുള്ള തന്ത്രപരമായ നീക്കങ്ങളിലാണ് ഇന്നു കേന്ദ്ര സംസ്ഥാന സര്‍ക്കാരുകള്‍. അടിസ്ഥാന ജനങ്ങളുടെ അടിസ്ഥാന ആവശ്യങ്ങള്‍ രാഷ്ട്രീയമായി പരിഹരിക്കുകയാണ് വേണ്ടത്. പകരം കൂലിയും വേലയും ചോദിക്കുന്നവന് വെടിയുണ്ട സമ്മാനിക്കുന്ന സാഹചര്യങ്ങള്‍ ആണ് നിലവില്‍ ഉള്ളത്. യാഥാര്‍ത്ഥ ഭീകരര്‍ ഭരണകൂടം ആണെന്നിരിക്കെ നാം കണ്ണടച്ച് ഇരുട്ടാക്കുന്നതില്‍ അര്‍ത്ഥമില്ല.

    ReplyDelete
  44. താങ്കള്‍ പറഞ്ഞതിനോട് ഞാനും യോജിക്കുന്നു.പക്ഷേ ചൂഷണത്തിന് എതിരെ സായുധ സമരത്തിനിരങ്ങുമ്പോള്‍ അവരെ അമര്‍ച്ച ചെയ്യാനെന്നു പറഞ്ഞു കൂടുതല്‍ പീഡനങ്ങള്‍ കാഴ്ച വെയ്ക്കുന്ന സര്കാരുകലാണ് നമുക്കുള്ളത്.പൊതു ജനങ്ങളും പറയും .അക്രമികളെ തുരതാനല്ലെ പാവം (?)സര്‍കാര്‍ ഇങ്ങനെ ചെയ്യുന്നത് എന്ന്.വിപ്ലവം ആയുധതിലൂടെയല്ല ,അറിവിലൂടെയാണ് വരേണ്ടത് എന്ന് ഞാന്‍ കരുതുന്നു .ആ പ്രദേശത്തെ ജനങ്ങളെ ആയുധ പരിശീലനം നല്‍കുന്നത് നിറുത്തിയിട്ടു അവരെ അറിവിലേക്ക് നയിക്കട്ടെ.ചില സ്ടലങ്ങളില്‍ അങ്ങനെ യും മാടങ്ങള്‍ കൊണ്ടുവരാം എന്ന് ഞാന്‍ കരുതുന്നു.എന്റെ വാകുകളില്‍ റെട്ടുന്ടെങ്കില്‍ ദയവായി തിരുത്തുക .സ്നേഹത്തോടെ ....................

    ReplyDelete
  45. ആരാണ് അവരെ പഠിപ്പിക്കുക? ആരാണ് അവര്‍ക്ക് ജോലിയും കൂലിയും നല്‍കുക? അവരെ അവരുടെ പരമ്പരാഗത ജോലികളില്‍ പോലും തുടരാന്‍ അനുവദിക്കാതെ ഇല്ലായ്മ ചെയ്യുവാന്‍ ആണ് സര്‍ക്കാര്‍ കരുക്കള്‍ നീക്കുന്നത്. സര്‍ക്കാരിന്റെ പോലീസിലും മാവോയിസ്റ്റുകളുടെ സേനയിലും കാഞ്ചി വലിക്കുന്ന പാവകള്‍ ആണ് ഇന്നു ആദിവാസികള്‍. മാവോയിസ്റ്റുകളുടെ ഉദ്ദേശ ശുദ്ധി എന്തായിരുന്നാലും ഇന്നവരുടെ പ്രവര്‍ത്തി എതിര്‍ ദിശയില്‍ ദരിദ്രരെ അപകടത്തില്‍ ആക്കിയിരിക്കുന്നു. ആയുധത്തിലൂടെ അല്ലാതെ വിപ്ലവം വരണം. പക്ഷേ ഇന്നവിടെ ആയുധമില്ലാതെ ആശയത്തിലൂടെ മുന്നേറുന്നവര്‍ ഏറ്റുമുട്ടലുകളില്‍ കൊല്ലപ്പെടുന്നു. കേരളത്തിലെ രാഷ്ട്രീയ സാഹചര്യമല്ല ബീഹാറിലും ആന്ധ്രയിലും.

    ReplyDelete
  46. neranu.keralathile saamuhya sahacharyangal alla avide ennu kettarivund.keralathilum vidyabhyasam itra janakeeyamakkiyath sarkar allallo.sannadha samghadanakalum christian missionanorimarum okkeyalle.ellavarum koodi yatnichu ennu parayam alle?athu pole oru mattam avide sadhyamaville ennanu ente chodyam.khanikalkkum van projectkalkum vendi ozhipikkapedukayum vikasanathinte peril chooshanam cheyyapedukayum cheyyunna janatha unaratee.athinu venda pinthunayanu namukku nalkanavuka.attarathilullla ella pravarthanangaleyum swagatham cheyyam.subhasamsakalode.................

    ReplyDelete
  47. neranu.keralathile saamuhya sahacharyangal alla avide ennu kettarivund.keralathilum vidyabhyasam itra janakeeyamakkiyath sarkar allallo.sannadha samghadanakalum christian missionanorimarum okkeyalle.ellavarum koodi yatnichu ennu parayam alle?athu pole oru mattam avide sadhyamaville ennanu ente chodyam.khanikalkkum van projectkalkum vendi ozhipikkapedukayum vikasanathinte peril chooshanam cheyyapedukayum cheyyunna janatha unaratee.athinu venda pinthunayanu namukku nalkanavuka.attarathilullla ella pravarthanangaleyum swagatham cheyyam.subhasamsakalode.................

    ReplyDelete

Post a Comment

Popular posts from this blog

പ്രണയം വിപ്ലവമാണ്

ആരാണ് രക്തസാക്ഷി?

സ്നേഹം എന്നാല്‍ എന്താണ്?