മുല്ലപ്പൂ വിപ്ലവകാലത്തെ സ്വപ്‌നങ്ങള്‍

പഴയ സ്വപ്‌നങ്ങള്‍
പാതിരാത്രിയില്‍
രഹസ്യ പോലീസിന്റെ കണ്ണു വെട്ടിച്ച്
പുരപ്പുറത്തുകയറി ഓടു പൊളിച്ച്
മച്ചകം വഴി
മെത്ത പായിലേക്ക്‌
ഊര്‍ന്നിറങ്ങുകയാണ് പതിവ്.

പുഴ നീന്തിക്കടന്ന്,
മലകള്‍ മറികടന്ന്
സര്‍പ്പങ്ങളുടെ തലയില്‍ ചവുട്ടി
രഹസ്യ സന്ദേശങ്ങളുമായി
വന്നിരുന്നു ചില സ്വപ്‌നങ്ങള്‍.

കാട്ടു പൊന്തയുടെ മറവില്‍,
തോണിയില്‍,
ശ്രീ കോവിലിനു പുറകില്‍,
രഹസ്യ കേന്ദ്രങ്ങളില്‍
രാകി മിനുക്കുന്ന സ്വപ്‌നങ്ങള്‍.

കലാലയങ്ങളില്‍
ചുവരെഴുത്തുകളില്‍ നിന്നും
കടും തുടികൊട്ടി
കലാപമായി ആളിപ്പടരുന്ന സ്വപ്‌നങ്ങള്‍.
ചുണയുള്ള മീശകളില്‍ തൂങ്ങി
തെറുത്ത് വെച്ച കൈകളില്‍ ഉയര്‍ന്ന്
ഹൃദയങ്ങളെ തുളച്ച്
അലറുന്ന സ്വപ്‌നങ്ങള്‍.

അന്ന്
വേട്ടപ്പട്ടികള്‍
സ്വപ്നങ്ങളുടെ ചോരമണത്ത്
നാല്‍ക്കവലകളില്‍ പതുങ്ങി നിന്നു.

കാമുകിക്ക് ചുംബനം കൊടുക്കുമ്പോള്‍
അമ്മ വിളമ്പുന്ന അന്നം ഉണ്ണുമ്പോള്‍
സ്വപ്നങ്ങളെ വിലങ്ങു വെച്ച്
കൊണ്ടു പോയി.

മസ്തിഷ്ക്കങ്ങള്‍ തകര്‍ത്ത്
സ്വപ്നങ്ങളെ വലിച്ചു പുറത്തിട്ടു.
ലോക്കപ്പ് മുറികളില്‍
ചോര കക്കും വരെ മര്‍ദ്ദിച്ചു.
രാത്രി തീരും മുന്‍പ്
പല സ്വപ്നങ്ങളും ഇല്ലായ്മ ചെയ്യപ്പെട്ടു.

ഇന്ന്
സ്വപ്നങ്ങള്‍ക്ക്
പടികടന്നു പൂമുഖത്ത് വന്നിരിക്കാം.
കുശലങ്ങള്‍ പറഞ്ഞു
വെളുക്കുവോളം ചിരിക്കാം.

ഫെയ്സ് ബുക്കിലും ഓര്‍ക്കൂട്ടിലും
ഇരുന്നു സര്‍ഗ്ഗസംവാദം നടത്താം
ബൂട്ടുകളുടെ പേടിപ്പിക്കുന്ന സ്വരത്തിന്
ചങ്കിടിപ്പോടെ കാതോര്‍ക്കേണ്ടതില്ല
എസി ക്യാബിനില്‍ രോമാഞ്ചത്തോടെ
ചാഞ്ഞിരുന്ന് പുഞ്ചിരിക്കാം

മുല്ലപ്പൂ വിപ്ലവസ്വപ്‌നങ്ങള്‍
പൂത്തു പരിലസിക്കുന്ന കാലമാണ്.

Comments

  1. കവിത നന്ന്.
    പക്ഷെ വിപ്ലവം എല്ലായിടത്തും ഇന്നും അടിച്ചമര്‍ത്തുക തന്നെയാണ്. ദൂരെയൊന്നും പോവേണ്ട, വടക്കേ ഇന്ത്യയില്‍ വികസനത്തിന്റെ പേരില്‍ കുടിയോഴിപ്പിക്കപ്പെടുന്നവരെ മുല്ലപ്പൂ കൊടുത്തല്ല ,ബൂട്ടിട്ടവര്‍ സ്വീകരിക്കുന്നത്.

    ReplyDelete
  2. ഇത് സ്ത്രീകള്‍ക്കെതിരെയുള്ള ശക്തവും ഗൂഡവുമായ ആരോപണം അല്ലെ എന്ന് ഞാന്‍ സംശയിക്കുന്നു.

    ചുമ്മാ പറഞ്ഞതാ, നന്നായിട്ടുണ്ട്, വീണ്ടും വരാം.

    ReplyDelete
  3. @ Haneefa Mohammed അക്ഷരം പ്രതി ശരിയാണ്. ഈ കവിത അവരെയല്ല ലക്‌ഷ്യം വെക്കുന്നത്. വിപ്ലവം ഫെയ്സ് ബുക്കിലേക്കൊക്കെ ചുരുക്കിയ പെറ്റി ബൂര്‍ഷ്വാ വിപ്ലവ വായാടികളെ ആണ്. വടക്കേ ഇന്ത്യയിലെ ആദിവാസികളുടെ പോരാട്ടങ്ങളെ ചോരയില്‍ മുക്കി കൊന്നുകൊണ്ടിരിക്കുന്നത് മറക്കുന്നില്ല.

    ReplyDelete
  4. നമ്മുടെ നാട്ടിലെ പുത്തൻ തലമുറ ഈ സ്വപ്നങ്ങളൂടെ പൂവ്വണിയലുകൾ മാത്രമേ കണ്ടിട്ടുള്ളൂ...
    ഇന്നവർക്കെല്ലാം മുല്ലപ്പൂ പോൽ സുന്ദരം..
    പക്ഷേ ലോകത്തിന്റെ പലഭാഗങ്ങളിലും ഇന്നും സ്വപ്നങ്ങൾ കാണാൻ പറ്റാതെ എത്രയോ പേർ ബൂട്ടിനടിയിലും,മറ്റും കിടന്ന് ഞെരിഞ്ഞമർന്നു കൊണ്ടിരിക്കുന്നൂ....!

    ReplyDelete
  5. വിപ്ലവം 18 ഇഞ്ച് മോണിട്ടറില്‍ കൂടി....കട്ടന്‍ ചായയും പരിപ്പുവടയും കഴിച്ച് വിപ്ലവം വളര്‍ത്താന്‍ കഴിയില്ലെന്ന് പറയുന്നവരുടെ കാലത്ത് ഇതും ഇതിലപ്പുറവും നടക്കും.

    ReplyDelete
  6. വിപ്ലവ കവിത ഒരു ആവേശം ജനിപ്പിക്കുന്നുണ്ട് വായനയില്‍
    നന്നായിരിക്കുന്നു സഖാവേ.
    ലാല്‍‌സലാം!

    ReplyDelete
  7. സമത്വവും, സ്വാതന്ത്ര്യവും വിപ്ലവവും സ്വപ്‌നം കണ്ടവരേയും സഹജീവികള്‍ക്കു വേണ്ടി ജീവിക്കാന്‍ മറന്നവരേയും നമുക്ക് മറക്കാം. ഫെയ്സ് ബുക്കിലും ഓര്‍ക്കൂട്ടിലും ഇരുന്നു സര്‍ഗ്ഗസംവാദം നടത്താം. കാരണം ഞാനൊരു സ്വപ്ന ജീവിയാണ്.

    ഏ.സി മുറിയിലിരുന്ന് വിപ്ലവം പ്രസംഗിക്കുന്നവര്‍‌ക്കിട്ട് നല്ലൊരു കൊട്ടാണല്ലോ ഈ കവിത. ഇടയ്ക്കിങ്ങിനെയൊരു ഓര്‍മ്മപ്പെടുത്തല്‍ ആവശ്യമാണ്‌. നന്നായിട്ടുണ്ട്.

    ReplyDelete
  8. വിപ്ലവ കാരികളും സ്വപ്ന ജീവികളാണ് ..ഒരിക്കലും നടക്കാത്ത കാര്യങ്ങള്‍ സ്വപ്നം കാണുന്നവര്‍

    ReplyDelete
  9. കവിത കൊള്ളാം ...

    ReplyDelete
  10. roadil irangi prathikarikkathe computerinu mumpil irunnu viplavam parayal..

    ReplyDelete
  11. എ സി മുറിയില്‍ ഇരുന്നു എഴുതി പിടിപ്പിക്കുന്ന,വിയര്‍പ്പറിയാത്ത, നോവറിയാത്ത, ത്യാഗമില്ലാത്ത ഒന്നിനോടും ആരോടും പ്രതിബദ്ധതയില്ലാത്ത ഇന്നിന്റെ വിപ്ലവങ്ങള്‍ ..അല്ലെ..

    ReplyDelete
  12. ആയിരങ്ങള്‍ ഓരോ നിമിഷവും വേട്ടയാടപ്പെടുന്ന കാലഘട്ടമാണിത് .എതിര്‍പ്പുകളും കൂടി കൂടി വരുന്നു..പക്ഷെ നമ്മുടെ നാട്ടില്‍ തന്നെ പലതരത്തിലും അടിച്ചമര്‍ത്തപ്പെടുന്നവരുണ്ട് ,അന്യസംസ്ഥാന തൊഴിലാളികള്‍ ,ചുമ്മട്ടുകാരുടെ മുമ്പില്‍ നാട്ടുകാര്‍,അങ്ങനെ ഒട്ടനവധിയാളുകള്‍ .
    വിപ്ലവകവിതക്ക് ആശംസകള്‍..

    ReplyDelete
  13. kavitha kollam

    hai...njan... puthiya alla.... pradeep .kusumbu parayanvendi vannatha
    edyke enne onnu nokkane...
    venamengil onnu nulliko....
    nishkriyan

    ReplyDelete
  14. ഇന്നലെ ഉറക്കം തൂങ്ങി ഇരുന്നപ്പോഴാണ് വായിച്ചത്. അത്രയ്ക്കങ്ങോട്ട് കിട്ടിയില്ല. ഇന്ന് നല്ല ബോധത്തില്‍ വായിച്ചപ്പോഴാണ്...

    പറഞ്ഞതൊക്കെ അക്ഷരം പ്രതി ശരി. നന്നായി, ഭംഗിയായി പറയുകയും ചെയ്തു. കട്ടന്‍ ചായയും പരിപ്പുവടയും എവിടെ, ആഡംബര കാര്‍ എവിടെ?
    എന്നാലും... ആ പേര് മാത്രം എനിക്കിഷ്ടമായില്ല.

    ReplyDelete
  15. സ്വപ്നങ്ങളില്‍ നിന്നല്ലേ സഖാവേ യാഥാര്‍ത്യങ്ങളിലെക്കുള്ള വഴി തുറക്കുന്നത്. എല്ലാറ്റിനെയും എതിര്‍ക്കണമോ? കൂട്ടായ്മകള്‍ ഇല്ലാതാകുമ്പോള്‍ ഏതുതരം കൂട്ടായ്മയും ഞാന്‍ സ്വാഗതം ചെയ്യുന്നു.പരസ്പരം കാണാനും കേള്‍ക്കാനും അത് മാത്രമേ ഉള്ളൂ എങ്കില്‍ ഇനി ഒരു കാലത്ത് ഒരു ആശയത്തെ കൂട്ടി യോജിപ്പിക്കുന്ന കണ്ണിയും അത് ആയിക്കൂടെ ?
    ഓര്‍മ്മപ്പെടുത്തലിനു നന്ദി .......

    ReplyDelete
  16. @ സോണി
    Jasmine Revolution എന്നാണല്ലോ അറബു നാടുകളില്‍ അരങ്ങേറിയ വിപ്ലവത്തെ വിളിക്കുന്നത്. FaceBook വഴിയാണത്രേ Jasmine Revolution ആസൂത്രണം ചെയ്യപ്പെട്ടത്. അതാണ്‌ ഈ പേര് കൊടുത്തത്,

    ReplyDelete
  17. @ഞാന്‍ ...
    തീര്‍ച്ചയായും ഇന്നത്തെ സ്വപ്‌നങ്ങള്‍ ആണ് നാളത്തെ യാഥാര്‍ത്യങ്ങള്‍. പുതിയ കാലത്തിനനുസൃതമായി പുതിയ കൂട്ടായ്മകള്‍ തീര്‍ച്ചയായും വരും. അപ്പോള്‍ അതിനു അനുസൃതമായി വൈകാരിക അടുപ്പങ്ങളും കുറഞ്ഞു പോകും. എല്ലാം എളുപ്പമായ ഒന്നായി തീരുന്നു. പക്ഷേ വിപ്ലവങ്ങള്‍ ആരെ ലക്‌ഷ്യം വെക്കുന്നുവോ അവരില്‍ ഇതൊന്നും എത്താതെയും പോകുന്നു. ഇന്റര്‍നെറ്റില്‍ നടക്കുന്ന ചര്‍ച്ചകള്‍ പലപ്പോഴും സ്വയം ഭോഗത്തിന്റെ രസങ്ങളിലേക്ക് വീണുപോകുന്നുണ്ടോ എന്നാണ് എന്റെ ഭയം.

    ReplyDelete
  18. Bhanu.. I suspect whether its an angry response of sachithanandan's poem; which I feel like what you said
    Some of the lines:-
    ‘Revolution no more comes
    through the barrel of a gun:
    it comes when the taut hearts of
    the desperate begin to beat fast
    in a single rhythm,
    when solitudes of different hues
    turn into fluttering flags

    Treacherous leaders, beware!
    Fear our non-violence!
    Jasmines can appear anywhere,
    any time lambs can grow eagle’s wings
    One never knows from which heart to which
    this fragrant white current might flow.
    It is hard to foretell: like love for us,
    and death, for you.

    For full text http://www.facebook.com/note.php?note_id=10150125803406938

    ReplyDelete
  19. ചിന്തയിലെ വിപ്ലവം , നന്നായി,

    ReplyDelete
  20. ഏസി മുറിയിലും വിപ്ളവം ജനിയ്ക്കും, അത് അവസാനം ശീതീകരിച്ച് ഉറഞ്ഞുപോകും.

    ReplyDelete
  21. ശരിയാണു..ഇന്നു വിപ്ലവം ഫേസ് ബൂക്കിലും മറ്റുമായി ചുരുങ്ങി...പഴയ വിപ്ലവകാരികളുടെ ആത്മാക്കൾ കേഴുന്നുണ്ടാവുമോ അതോ പരിഹസിക്കയാവുമോ

    ReplyDelete
  22. @ഭാനു കളരിക്കല്‍: വിപ്ലവം ഇന്നല്ലെങ്കില്‍ നാളെ സംഭവിക്കുമെന്നും അത് നന്മ മാത്രമേ പിന്നീട് നല്‍കൂ എന്നും ഞാന്‍ വിശ്വസിച്ചിരുന്ന ഒരു കാലമുണ്ടായിരുന്നു. നന്മ ഒരു തീപ്പൊരിയായി എന്റെയും നിങ്ങളുടെയുമൊക്കെ മനസ്സില്‍ നില്‍ക്കുന്നുന്ടെന്നു ഞാന്‍ ഇപ്പോഴും വിശ്വസിക്കുന്നു.ഒരു അനീതി കണ്ടാല്‍ ഒറ്റയ്ക്ക് നില്‍ക്കുമ്പോള്‍ എതിര്‍ക്കാന്‍ ധൈര്യപ്പെടാത്ത മനുഷ്യന്‍ ഒന്നോ രണ്ടോ പേര്‍ കൂടി ഉണ്ടെന്നു കണ്ടാല്‍ എങ്കിലും എതിര്‍ക്കുന്നില്ലേ?അവിടെയും വിട്ടിട്ട് പോകുന്ന ആള്‍ക്കാര്‍ ഇല്ലെന്നല്ല.അതൊരു കാഴ്ചപ്പാടിന്റെ വ്യത്യാസം. ഒരു കൂട്ടം ആള്‍ക്കാരുടെ ചെറിയ തെറ്റുകളെ തിരുത്താന്‍ എന്ന് പറഞ്ഞുകൊണ്ട് അവരെ പാഠം പഠിപ്പിക്കാന്‍ അതിലും എത്രയോ കൂടുതല്‍ തെറ്റുകള്‍ ചെയ്യുന്നവരെ പകരക്കാരായി തെരഞ്ഞെടുത്തിട്ടു ഞങ്ങള്‍ വ്യവസ്ഥിതിയെ തിരുത്താന്‍ ആണ് അങ്ങിനെ ചെയ്തതെന്ന് പറയുമ്പോള്‍ അതില്‍ എന്തര്‍ത്ഥം? പുഴുക്കുത്തുകള്‍ ഉള്ള പഴത്തെയാണ് പുഴുക്കുത്തുകള്‍ മെഴുക് കൊണ്ട് മൂടി ഭംഗിയാക്കിയ പഴത്തെക്കാള്‍ എനിക്കിഷ്ടം.
    പിന്നെ ഞാന്‍ കൂട്ടായ്മകള്‍ എന്നും സ്വാഗതം ചെയ്യുന്നു.ഞാന്‍ കത്തെഴുതാന്‍ തയ്യാറായാലും ഫോണിലോ ഇമെയിലിലോ ആവും മറുപടി കിട്ടുക എന്ന് വച്ച് ഞാന്‍ അതും ഉപേക്ഷിക്കാന്‍ തയ്യാറല്ല.നെറ്റിലൂടെ മാത്രം പരിചയമുള്ള സുഹൃത്തുക്കളെ വെറുതെ കാണാന്‍ ഞാന്‍ തെക്കുനിന്നു വടക്കുവരെ യാത്ര ചെയ്തിട്ടുണ്ട്. നന്മയും തിന്മയും പകരുമ്പോള്‍ നമുക്ക് നന്മ പകര്‍ത്താന്‍ ശ്രമിച്ചു കൂടെ ചില ബ്ലോഗുകളിലെന്കിലും നിരന്തരം നന്മയെക്കുറിച്ചു എഴുതുന്നവരുണ്ട് .ന്യൂന പക്ഷം ഭൂരിപക്ഷം ആവില്ലായിരിക്കാം എണ്ണം കൂടുന്നത് പോലും നല്ലതല്ലേ?
    പിന്നെ സ്വപ്നസ്ഖലനത്തേക്കാള്‍ നല്ലതല്ലേ സ്വയംഭോഗം ..........
    ഓരോ വ്യക്തിയുടെയും നന്മയില്‍ നിന്നാണ് സമൂഹത്തിന്റെ നന്മയിലേക്ക് കാര്യങ്ങള്‍ പോകുന്നത് എന്ന് ഞാന്‍ വിശ്വസിക്കുന്നു.
    തര്‍ക്കത്തിനല്ല ഞാന്‍ എന്റെ ഭാഗം വിശദീകരിക്കാന്‍ ശ്രമിച്ചതാണ്.

    ReplyDelete
  23. നല്ല കവിത ....

    ReplyDelete
  24. @ഞാന്‍
    നൂറു പൂക്കള്‍ വിരിയട്ടെ എന്ന നിലപാടാണ് എനിക്കുള്ളത്. എല്ലാ വഴികളും നന്മയെ സാക്ഷാല്‍കരിക്കാന്‍ ആവുക. താങ്കളുടെ നിലപാടുകളോട് ഞാനും തര്‍ക്കിക്കുന്നില്ല. കാരണം താങ്കള്‍ പറഞ്ഞ കാര്യങ്ങളോട് എനിക്ക് യോജിപ്പ് മാത്രമാണുള്ളത്. ഞാന്‍ വീണ്ടും ആവര്‍ത്തിക്കുന്നത് നമ്മുടെ സുഹൃത്തുക്കള്‍ ആത്മരതിയിലേക്ക് വീണു പോകുന്നുവോ എന്ന ഭയമാണ് ഈ കവിത എഴുതുവാനുള്ള പ്രചോദനം എന്നാണ്. തെരുവുകള്‍ രക്ത പങ്കിലമാവുമ്പോള്‍ നാം നിഷ്ക്രിയരാകുന്നുവോ?

    ReplyDelete
  25. @ ഭാനു കളരിക്കല്‍ : ഞാന്‍ തര്‍ക്കിക്കുകയോ എതിര്‍ക്കുകയോ അല്ല അവശേഷിക്കുന്ന നന്മയെ പരിരക്ഷിക്കാതെ കൂടി നില്‍ക്കുന്ന തിന്മയെ ഓങ്ങി വെട്ടുന്നത് നന്മയ്ക്ക് കൂടിയാണ് കൊള്ളുന്നത്‌ എന്ന് ഓര്‍മ്മിപ്പിക്കാന്‍ ശ്രമിച്ചതാണ്.നമ നിലനിര്‍ത്തി തിന്മയെ മാത്രം എതിര്‍ക്കാന്‍ നമുക്ക് കഴിയുന്നില്ല.തെരുവുകള്‍ രക്തപന്കിലമാകുമ്പോള്‍ അത് ആര്‍ക്കു വേണ്ടി ചെയ്തതാണെന്ന് കൂടി നോക്കണം. തെരുവിലിറങ്ങുന്നവര്‍ ചിന്തിക്കുന്നുണ്ടോ ഞങ്ങള്‍ എന്തിനു വേണ്ടി ഇറങ്ങി എന്ന് ? ഇന്ന് നേതാക്കള്‍ പറയുന്നത് കേള്‍ക്കാതെ സ്വയം പഠിക്കുന്നവര്‍ എത്ര പേരുണ്ട് ?അണികളുടെ സംശയം ചോദിക്കാനുള്ള അവകാശം സംരക്ഷിക്കുന്ന എത്ര പ്രസ്ഥാനങ്ങള്‍ ഉണ്ട് ? അറിവുകളാണ് നമുക്ക് ആവശ്യം. ഞാന്‍ നിങ്ങളെ എതിര്‍ക്കാന്‍ ശ്രമിക്കുകയാണെന്ന് ദയവായി ചിന്തിക്കരുത്. നിങ്ങളുടെ വരികളാണ് എന്നെ കൂടുതലായി ചിന്തിപിക്കുന്നത്.ഒരിക്കല്‍ക്കൂടി നന്ദി.

    ReplyDelete
  26. വിപ്ളവത്തിന്റെ കാലഗണനകൾ നന്നായി...
    നല്ല ആശയം! പക്ഷേ, വരികളിൽ കവിത കുറഞ്ഞ പോലൊരു ഫീൽ....

    ReplyDelete
  27. ഫേസ്ബുക്ക് വിപ്ലവം മിക്കപ്പോഴും അധരവ്യായാമത്തിന്റെ സൈബർ ഭാഷയാണെന്നതു സത്യം തന്നെ. പക്ഷേ പുതിയ കാലത്ത് ഫേസ്ബുക്കു പോലുള്ള സൈബർ കൂട്ടായ്മകൾ നല്ലൊരു പ്രചരണോപാധിയെന്ന നിലയിൽ ഉപയോഗപ്പെടുത്താൻ പുരോഗമന പ്രസ്ഥാനങ്ങൾക്ക് കഴിയുകയും വേണം. കവിത പഴയ മെസഞ്ചർകാലത്തു നിന്ന് ഇവിടെ വരെ ട്രേസ് ചെയ്ത രീതി നന്നായി.

    ReplyDelete
  28. ആത്മാർഥതയില്ലാത്ത ഒന്നും വിപ്ലവമായി വിജയിച്ചില്ല, ഒരു തീപ്പൊരിയായി, ചിലത് കത്തി, ചിലത് ആളി, ചിലത് പുകഞ്ഞു, ചിലത് കെട്ടു....... എങ്കിലും ആ തീപ്പൊരി ഇപ്പോഴും എവിടെയെല്ലാമോ ആളിപ്പിടിയ്ക്കാനായി കാത്തിരിയ്ക്കുന്നു....

    അതുകൊണ്ട് സൈബർ കാലത്തെ മാത്രം അറിയുന്നവരിലും പ്രതീക്ഷ.... സൈബർ എന്ന വാക്ക് ഒരിയ്ക്കൽ പോലും കേട്ടിട്ടില്ലാത്തവർ നിറഞ്ഞ ഈ ഭൂമിയിൽ......ഇപ്പോഴും പ്രതീക്ഷ...തീപ്പൊരി ജ്വലിയ്ക്കും. ആ സ്വപ്നങ്ങൾ ഫെയ്സ് ബുക്കിന്റെയോ ഓർക്കൂട്ടിന്റെയോ ഏ സി മുറിയുടെയോ അല്ലല്ലോ.

    കവിത ഇഷ്ടമായി.

    ReplyDelete
  29. kavitha manoharamayirikkunnu.yathartyathinte matoru mukham

    ReplyDelete
  30. ഫേസ്ബുക്കിലൂടെയൊക്കെ നടക്കുന്ന (എന്നു പറയപ്പെടുന്ന) നവോത്ഥാനങ്ങളെ (വിപ്ലവമല്ലത്) തള്ളിപ്പറയുക എന്നതല്ല ഭാനു ഉദ്ദേശിച്ചത് എന്ന് വിചാരിക്കുന്നു. ഇതിനെ ആത്യന്തിക വിപ്ലവ പാതയായി ധരിച്ച് മൂഢസ്വർഗത്തിൽ നിൽക്കുന്നവരെയാണ് ഈ കവിത അഭിസംബോധന ചെയ്യുന്നത് എന്നാണെനിക്ക് തോന്നിയത്. വിപ്ലവമോ.. അതൊക്കെ പഴൻചൻ ആശയമല്ലെ എന്നു പറയുന്നവർക്ക് ചരിത്രബോധമില്ല എന്നേ പറയാനാവൂ. ഒരു കമ്യൂണിസ്റുകാരനും വിചാരിക്കുന്നുണ്ടാവില്ല നാളെ വിപ്ലവം നടത്താമെന്ന്.വിപ്ലവം ആകാശത്തുനിന്നു പൊട്ടി വീഴുന്നതല്ല. As Chairman Mao said “Revolution is not a dinner party, not an essay, nor a painting, nor a piece of embroidery; it cannot be advanced softly, gradually, carefully, considerately, respectfully, politely, plainly and modestly.”

    ReplyDelete
  31. പഴയ സ്വപ്‌നങ്ങള്‍
    പാതിരാത്രിയില്‍
    രഹസ്യ പോലീസിന്റെ കണ്ണു വെട്ടിച്ച്
    പുരപ്പുറത്തുകയറി ഓടു പൊളിച്ച്
    മച്ചകം വഴി
    മെത്ത പായിലേക്ക്‌
    ഊര്‍ന്നിറങ്ങുകയാണ് പതിവ്.

    double like !!


    കവിത ഇഷ്ടായി ... ഭാനു ഏട്ടാ ഉമ്മ !! :))

    ReplyDelete

Post a Comment

Popular posts from this blog

ആരാണ് രക്തസാക്ഷി?

പ്രണയം വിപ്ലവമാണ്

സ്നേഹം എന്നാല്‍ എന്താണ്?