മുറിയുന്നത്‌ നല്ലതാണ്...

ചില മുറിവുകള്‍ക്ക്‌
ആഴക്കടലിന്റെ ആഴമായിരിക്കും.
തിരകളും ചുഴികളുമില്ലാതെ
സ്വസ്ഥവും ശാന്തവുമായ മേല്‍‌പ്പരപ്പ്‌
മോഹിപ്പിച്ചുകൊണ്ടേയിരിക്കും.

അസ്ഥികളെ തുരക്കുന്ന
മുറിവുകള്‍ ഉണ്ട്.
അസ്ഥിവാരം ഇളകിയ ചില്ലുഗോപുരം പോലെ
നിനച്ചിരിക്കാതെ വീണുടയും.

കനലുപോലെ നീറുന്ന മുറിവുകള്‍
മറവികളുടെ മഴയില്‍ കെട്ടുപോയേക്കാം
ഉള്ളിലെ നീറ്റലൊടുങ്ങാതെ  
ഒരിക്കല്‍ ലാവയായി ഒഴുകുംവരെ.

പകര്‍ച്ച വ്യാധിപോലെ
ചില മുറിവുകള്‍
ഒരാളില്‍ നിന്നു മറ്റൊരാളിലേക്ക്
പടര്‍ന്നു കയറും.
മുറിവേറ്റവരുടെ സംഘഗാനമായി
തെരുവുകളില്‍ ചോര നിറയ്ക്കും.

ജനിതകങ്ങളിലൂടെ സംക്രമിക്കുന്ന മുറിവുകള്‍
അംഗവൈകല്യം
വന്ന സന്തതി പരമ്പരകളെ പെറ്റുകൂട്ടും.

സുഷുപ്തിയിലാര്‍ന്ന ചില മുറിവുകള്‍
ക്വാണ്ടം കുതിച്ചു ചാട്ടം കൊണ്ട്
വിസ്ഫോടനങ്ങള്‍ സൃഷ്ടിക്കും.

മുറിയുന്നത്‌ നല്ലതാണ്.
നീറുന്ന മറുമരുന്നുകൊണ്ട്
സുഖപ്പെടുമെങ്കില്‍...

Comments

  1. പകര്‍ച്ച വ്യാധിപോലെ
    ചില മുറിവുകള്‍
    ഒരാളില്‍ നിന്നു മറ്റൊരാളിലേക്ക്
    പടര്‍ന്നു കയറും.

    ചില മുറിവുകൾ അങ്ങനെയാണ്.

    ReplyDelete
  2. "കനലുപോലെ നീറുന്ന മുറിവുകള്‍
    മറവികളുടെ മഴയില്‍ കെട്ടുപോയേക്കാം"
    ഞാന്‍ വിശ്വസിക്കുന്നില്ല .......
    ഇതൊരു surf excel ന്റെ പരസ്യം പോലെ ...
    (ഈ പോസ്റ്റിന്റെ ഗൌരവം ഉള്‍ക്കൊണ്ടുതന്നെ പറഞ്ഞതാണ് )

    ReplyDelete
  3. അസ്ഥികളെ തുരക്കുന്ന
    മുറിവുകള്‍ ..
    ഇഷ്ട്ടപ്പെട്ടു
    നല്ല കവിത ...ആശംസകള്‍

    ReplyDelete
  4. സ്നേഹതന്‍ വരുത്തുന്ന മുറിവുകള്‍ വിശ്വസ്ഥതയുടെ ഫലം

    ReplyDelete
  5. മുറിവുകള്‍ മുറിവുകളായിതന്നെ ശേഷിക്കും പലപ്പോഴും അല്ലേ, ഒരു മരുന്നിനും ഉണക്കാനാവാതെ.

    ReplyDelete
  6. "മുറിയുന്നത്‌ നല്ലതാണ്.
    നീറുന്ന മറുമരുന്നുകൊണ്ട്
    സുഖപ്പെടുമെങ്കില്‍..."

    ഈ വരികളില്‍ കവിയുടെ കയ്യൊപ്പുണ്ട്. ആശംസകള്‍.

    ReplyDelete
  7. "കനലുപോലെ നീറുന്ന മുറിവുകള്‍
    മറവികളുടെ മഴയില്‍ കെട്ടുപോയേക്കാം
    ഉള്ളിലെ നീറ്റലൊടുങ്ങാതെ
    ഒരിക്കല്‍ ലാവയായി ഒഴുകുംവരെ..."

    "ഞാന്‍" ഈ കവിത പൂര്‍ണ്ണമായ അര്‍‌ത്ഥത്തില്‍ ഉള്‍കൊണ്ടില്ല എന്നു തോന്നുന്നു. അതുകൊണ്ടായിരിക്കാം തെറ്റായ വ്യാഖ്യാനത്തിലേയ്ക്ക് എത്തിച്ചേര്‍ന്നത്.

    ReplyDelete
  8. മുറിവുകൾ-ഭാനു പറഞ്ഞപോലെ തന്നെ, നനാ തരങ്ങളിൽ. ക്കവിത ഇഷ്ടമായി.പകർച്ചവ്യാധിപോലുള്ള മുറിവുകളൊന്നും പടരുന്നില്ലല്ലോ എന്നാണ് സങ്കടം. ഒറ്റപ്പെട്ട മുറിവുകൾ ഉണ്ടെങ്കിലും.

    ReplyDelete
  9. നല്ല വരികള്‍.

    ReplyDelete
  10. കുഞ്ഞു വരികളില്‍ ഒളിഞ്ഞിരിക്കുന്നു...ഭാനുവിന്റെ കയ്യൊപ്പ്.ഇഷ്ടപ്പെട്ടു..ആശംസകള്‍..

    ReplyDelete
  11. മുറിവുകള്‍. ആഴവും നീളവും വീതിയും സ്വഭാവങ്ങളും വിവിധങ്ങളായി..
    പകരാത്ത മുറിവുകളാണല്ലേ കാലത്തിന്റെ സങ്കടം.

    ReplyDelete
  12. "മുറിയുന്നത്‌ നല്ലതാണ്.
    നീറുന്ന മറുമരുന്നുകൊണ്ട്
    സുഖപ്പെടുമെങ്കില്‍..."
    ഇഷ്ടായി മാഷേ ...

    ReplyDelete
  13. മുറിയുന്നത്‌ നല്ലതാണ്.
    നീറുന്ന മറുമരുന്നുകൊണ്ട്
    സുഖപ്പെടുമെങ്കില്‍...
    ഭാനുവേ എന്നത്തേയും പോലെ വളരെ നല്ല കവിത. ചില മുറിവുകളൊരിക്കലും ഉണങ്ങുകയില്ല. അതില്‍ നിന്നും ഊറിയ വേദന ഹൃദയത്തിന്‍റ അടിത്തട്ടിലുറഞ്ഞു പോകും. അവസാനം എരിയുന്ന ചിതയില്‍ നിന്നും അതിന്‍റ ചുടുപരന്ന് മുറിയാത്ത ഹൃദയിത്തിലോട്ടാവാഹിക്കും അന്നതിലൊരു കനലു വീഴും. അത് നീറി നീറി തപിക്കും. ഒന്നു കൂടിപ്പറയട്ടെ വളരെ നല്ല കവിത

    ReplyDelete
  14. എല്ലാം നന്നായി ഭാനു

    കവിതയില്‍ ഒരു വിസ്പോടനം മുറിയാതെ മുറിക്കുന്നു ...:)

    ചില സംഗതികളില്‍ നിന്നു കവിതയുടെ ഒഴുക്ക് ....അത് ഒരു മുറിവില്‍ നിന്നായാലും ....

    ReplyDelete
  15. @ ഞാന്‍ said...
    കവിത എഴുതുമ്പോഴും ഇപ്പോള്‍ ഒരു ചങ്ങാതി സമാനമായ പരസ്യവാചകം ഉണ്ടെന്നു പറയുന്നത് വരേയ്ക്കും എനിക്കിതേ പറ്റി ബോദ്ധ്യമില്ലായിരുന്നു. ടിവി കാണാത്ത എന്റെ ഒരു കാര്യം. :)

    ReplyDelete
  16. മുറിയുന്നത്‌ നല്ലതാണ്,
    ചോരയെ പേടിയില്ലെങ്കില്‍,
    നോവില്‍ വീഴില്ലെങ്കില്‍‍‍,
    വേറെയാരും കൂടെയില്ലെങ്കില്‍....

    മുറിയുന്നത്‌ നല്ലതാണ്,
    നീറ്റലൊരു സുഖമാണെങ്കില്‍...

    മുറിവുകള്‍ പലതരം. ചിലത് നാം ഇഷ്ടപ്പെടുന്നവര്‍ ഒന്ന് ഊതിയാല്‍ കരിയുന്നവ, ചിലത് തുന്നിച്ചേര്‍ത്താലും തുറന്നിരിക്കുന്നവ. നല്ല വരികള്‍.

    അസ്ഥികളെ തുരക്കുന്ന മുറിവുകള്‍ നിനച്ചിരിക്കാതെ വീണുടയുമെന്നു പറഞ്ഞതിനോട് വിയോജിക്കുന്നു. അത്രത്തോളം തീവ്രമായ മുറിവുകള്‍ എങ്ങനെ പൊടുന്നനെ ഇല്ലാതാവും? അതോ, അത്രത്തോളം ആ മുറിവ് ഏറ്റയാള്‍ പൊടുന്നനെ വീണുടയുമെന്നോ? വായിച്ച എന്റെ മാത്രം കുഴപ്പമാണോ എന്തോ, സത്യമായും മനസ്സിലായില്ല.

    കറ നല്ലതാണ്, അത് കഴുകികളയാന്‍ സര്‍ഫ്‌ എക്സല്‍ ഉണ്ടെങ്കില്‍. അതുപോലെ മുറിവും നല്ലതാണ്, അതില്‍ മരുന്നുവയ്ക്കാനും ഊതിയുണക്കാനും നാം ഇഷ്ടപ്പെടുന്നവരുണ്ടെങ്കില്‍...

    ReplyDelete
  17. @- സോണി - said...
    എല്ലാ മുറിവും നല്ലതാണെന്ന് പറയുന്നില്ലല്ലോ സോണി? ഉണ്ടോ? അങ്ങനെ തോന്നിയെങ്കില്‍ എന്റെ തെറ്റ്. അസ്ഥികള്‍ തുരന്നുപോയ അസ്ഥിവാരം തകര്‍ത്ത മുറിവുകള്‍ നിനച്ചിരിക്കാതെ മുറിഞ്ഞ ആളെ കൊന്നുകളയും എന്നാണ്. നേരല്ലേ?

    ReplyDelete
  18. അതുതന്നെയായിരുന്നു എന്‍റെ സംശയവും,
    ആദ്യം വായിച്ചപ്പോള്‍ മുറിവിനെക്കുറിച്ചാണ് പറയുന്നതെന്ന് തോന്നി.
    വീണ്ടും ചിന്തിച്ചപ്പോള്‍ മുറിവേറ്റവനെക്കുറിച്ചാണെന്നും.
    ഇതില്‍ ഏതാ ഉദ്ദേശിച്ചത് എന്നറിയാനായിരുന്നു ചോദിച്ചത്.
    ചില പോറലുകളില്‍ നിന്നാണ് ചില ജീവിതങ്ങള്‍ തുടങ്ങുന്നതും, മറ്റു ചിലപ്പോള്‍ തകരുന്നതും.
    എല്ലാ മുറിവുകളും നല്ലതാണ്, എന്‍റെ അഭിപ്രായത്തില്‍.

    ReplyDelete
  19. @വായാടി :കനലുപോലെ നീറുന്ന മുറിവുകള്‍ ഒരിക്കലും ഒരവസ്ഥയിലും മറക്കാന്‍ കഴിയില്ല. അതിനോടാണ് എന്റെ, എന്റെ മാത്രം വിയോജിപ്പ്.
    @ഭാനു കളരിക്കല്‍ : ഞാന്‍ പറഞ്ഞ പരസ്യ വാചകം കൊണ്ട് ഈ കവിതയുടെ മൂല്യം അല്പം പോലും കുറയുന്നില്ല. താങ്കള്‍ എഴുതിയ ഒരു ചിന്തയോടുള്ള എന്റെ വിയോജിപ്പ്‌ പറഞ്ഞ കൂട്ടത്തില്‍ പറഞ്ഞ ഒരു വെറും കമന്റ് മാത്രം.എന്തെങ്കിലും കാണുമ്പോള്‍ അതിനോട് സാദൃശ്യമുള്ളത് തോന്നുമ്പോള്‍ പറയുന്നെന്നു മാത്രം.

    ReplyDelete
  20. എല്ലാ മുറിവുകളും മായ്ക്കുന്ന സ്നേഹമെന്ന മറുമരുന്നു..ഒരു പാട് സ്നേഹിക്കുന്നവര്‍ തരുന്ന മുറിവുകള്‍ക്ക്‌ എത്ര ആഴം..നീറിയും നൊന്തും അവ ആത്മാവിനോട് ചേര്‍ന്നെന്നും.

    ReplyDelete
  21. ഒരു മുറിവിന്റെ നൊമ്പരമായി ഈ കവിത

    ReplyDelete
  22. മുറിവുകൾ‌ പല വിധം...ചില മുറിവുകൾ മറവിയുടെ മഴയിൽ കെട്ടുപോണേ എന്ന് ആഗ്രഹിച്ചു പോകാറുണ്ട്...നന്നായി മാഷേ

    ReplyDelete
  23. മുറിവുകളെക്കുറിച്ച് വിശദമായിത്തന്നെ പഠിച്ചു .....നന്നായിട്ടുണ്ട്

    ReplyDelete
  24. മുറിവേല്‍ക്കുന്നതും
    മുറിവേല്‍പ്പിക്കുന്നതും നല്ലത്..
    സുഖമുള്ള മുറിവുകളെങ്കില്‍..

    എങ്കില്‍
    ആ മുറിവെനിക്കുണക്കേണ്ട..

    ReplyDelete

Post a Comment

Popular posts from this blog

പ്രണയം വിപ്ലവമാണ്

ആരാണ് രക്തസാക്ഷി?

സ്നേഹം എന്നാല്‍ എന്താണ്?