പ്രണയം വിപ്ലവമാണ്

പൂ വിടരും പോലെ
പ്രണയം ഇതള്‍ വിടര്ത്തുകയില്ല,
മഴവില്ലുപോലെ
ഹൃദയാകാശത്തെ അലങ്കരിക്കയുമില്ല. 

ഭൂമിക്കടിയിലെ കുളിരൊഴുക്ക് പോലെ
അത് കുഴിച്ചു കുഴിച്ചു ചെല്ലുന്നവനെ
 കാത്തിരിക്കുന്ന രത്നം.

 പ്രണയം
 തൂവല്‍ സ്പര്‍ശം പോലെ
 നിന്നെ ഉരുമ്മി പോവുകയില്ല.
 ഉറയൂരിയ വാളുപോലെ
ജീവശ്വാസം അരിഞ്ഞു കളയും.

ചങ്കുറപ്പില്ലാത്തവന്‍ പ്രണയിക്കരുത്;
 അര്‍ദ്ധമനസ്ക്കനെ
 പ്രണയമഴ പുല്‍കുകയില്ല.

മറികടക്കാന്‍ ആകാത്ത മരുഭൂമി പോലെ
നിന്നെയത് തളര്‍‌ത്തിക്കളയും.
ആഗ്രഹിക്കുന്നവന്റെ
നിശ്ചയമാണ് പ്രണയം.

ലോകത്തെ കീഴ്മേല്‍ മറിക്കുന്ന
ശ്രമകരമായ ദൌത്യം.
മുഷ്ടിക്കുള്ളിലെ സ്വര്‍ണമത്സ്യത്തെ കൈവിടാത്തവന്‍
ഈ മലനിര കീഴടക്കുകയില്ല.

പ്രണയം വിശുദ്ധമായ യുദ്ധമാണ്.
അത് വിധിയെ മാറ്റിമറിക്കുന്നു,
പഴഞ്ചന്‍ ശീലങ്ങളെ,
ഉച്ചയുറക്കത്തെ
അലോസരപ്പെടുത്തുന്നു.
സ്വാതന്ത്ര്യത്തിന്റെ പതാകയുമായി
പുതിയ ലോകത്തെ വിഭാവനം ചെയ്യുന്നു.

മരണം മുന്നില്‍ കണ്ടവന്റെ
അവസാന ജീവവായുവാണ് പ്രണയം.
വിശക്കുന്നവന്‍ ആര്‍ത്തിയോടെ വാരി വിഴുങ്ങിയ
അഗ്നിനാളങ്ങളാണ് പ്രണയം.

പ്രണയം വിപ്ലവമാണ് -
പുഞ്ചിരികൊണ്ടും നിലാവുകൊണ്ടും
മരണംകൊണ്ടും കണ്ണീരുകൊണ്ടും
അജയ്യമായ വിപ്ലവം..

Comments

  1. അതെ,പ്രണയം വിപ്ലവമാണു,ചങ്കുറപ്പില്ലാത്തവന്‍ അതിനു നില്‍ക്കരുത്.ലോകം കീഴ്മേല്‍ മറിച്ച് കളയും അത്...

    അഭിനന്ദനങ്ങള്‍...നല്ല വരികള്‍ക്ക്..

    ReplyDelete
  2. പ്രണയവിപ്ലവം

    ReplyDelete
  3. അര്‍ത്ഥ സമ്പുഷ്ടമായ മനോഹരമായ വരികള്‍

    ReplyDelete
  4. വിപ്ളവപ്പൂച്ചെടി-
    യ്ക്കെപ്പൊഴും പൂക്കുവാന്‍
    പറ്റുന്ന മുറ്റമേ
    മര്‍ത്യചിത്തം......

    ReplyDelete
  5. ഭൂമിക്കടിയിലെ കുളിരൊഴുക്ക് പോലെ
    അത് കുഴിച്ചു കുഴിച്ചു ചെല്ലുന്നവനെ
    കാത്തിരിക്കുന്ന രത്നം.

    നന്നായിരിക്കുന്നു.

    ReplyDelete
  6. പ്രണയം വിപ്ലവമാണ് -
    പുഞ്ചിരികൊണ്ടും നിലാവുകൊണ്ടും
    മരണംകൊണ്ടും കണ്ണീരുകൊണ്ടും
    അജയ്യമായ വിപ്ലവം..
    അതിമനോഹരം!!

    ReplyDelete
  7. ഊം, പ്രണയം വിപ്ലവമാണ്....!

    ReplyDelete
  8. പ്രണയം വിപ്ലവമാണോ , അറിയില്ലത്... പക്ഷേ, പ്രണയം ജീവിക്കാന്‍ പ്രേരിപ്പിക്കുന്നു, സര്‍വചരാചരങ്ങളെയും സ്നേഹിക്കാന്‍ പഠിപ്പിക്കുന്നു. ചുറ്റും സ്നേഹത്തിന്റെ മലരുകളും സൌരഭ്യങ്ങളും നിറക്കുന്നു...

    നല്ല വരികള്‍ക്ക് അഭിനന്ദനങ്ങള്‍ ഭാനൂ...

    ReplyDelete
  9. പച്ചയായി പറഞ്ഞാ‍ല്‍ എല്ലാറ്റിനോടും തോന്നുന്ന വാഞ്ചയാണ് പ്രണയം എന്നതല്ലേ ശരി?

    ReplyDelete
  10. മുഷ്ടിക്കുള്ളിലെ സ്വര്‍ണമത്സ്യത്തെ കൈവിടാത്തവന്‍
    ഈ മലനിര കീഴടക്കുകയില്ല.


    നല്ല വരികൾ...

    പക്ഷേ, യഥാരത്ഥത്തിൽ, പൂവിരിയും പോലെ പ്രണയം വിരികയും പൂ കൊഴിയും പോലെ കൊഴിയുകയും ചെയ്യും

    ReplyDelete
  11. പ്രണയിക്കാത്ത ഒരുവന്റെ യുദ്ധാനുഭവങ്ങള്‍ എങ്ങനെയിരിക്കുമെന്ന് അറിയാമോ ?

    ReplyDelete
  12. പ്രണയം വിപ്ലവമാണ് -
    പുഞ്ചിരികൊണ്ടും നിലാവുകൊണ്ടും
    മരണംകൊണ്ടും കണ്ണീരുകൊണ്ടും
    അജയ്യമായ വിപ്ലവം..
    അതെ,ഒരു വിപ്ലവം നയിക്കാൻ കഴിവില്ലാത്തവൻ പ്രണയിക്കാൻ പോകരുത്..!

    നന്നായിരിക്കുന്നു കവിത...
    ആശംസകൾ...

    ReplyDelete
  13. ഈ വിപ്ലവപ്രണയവിപ്ലവം മുമ്പ് വായിച്ച് ഒരു അഭിപ്രായമെഴുതിയതാണല്ലോ. അതെവിടെപ്പോയി

    ReplyDelete
  14. വിപ്ലവം വിജയിക്കട്ടെ..എപ്പോഴും എപ്പോഴും .. എപ്പോഴും വിജയിക്കട്ടെ ..

    നല്ല കവിതയ്ക്ക് ...ആശംസകള്‍.

    ReplyDelete
  15. പ്രണയത്തിന്റെ ഈ വാഴ്ത്തുപാട്ട് നന്നായിട്ടുണ്ട്!

    ReplyDelete
  16. മുഷ്ടിക്കുള്ളിലെ സ്വര്‍ണമത്സ്യത്തെ കൈവിടാത്തവന്‍
    ഈ മലനിര കീഴടക്കുകയില്ല.....പ്രണയത്തിനു ഇങ്ങനയും ഭാവമുണ്ട് അല്ലെ ...

    പ്രണയം എന്നും ഒരു സമസ്യാണ് ...
    എന്നാല്‍ പ്രണയത്തെ കീഴടക്കുമ്പോള്‍ അല്ല പ്രണയ നഷ്ടത്തിലാണ് പ്രണയത്തിന്റെ എല്ലാ ഭാവങ്ങളും നമ്മള്‍ അറിയുന്നത് എന്ന് എവിടെയോ വായിച്ചതു ഓര്‍ക്കുന്നു

    ReplyDelete
  17. ശരിയാണ്...പ്രണയിക്കാന്‍ ശക്തമായ മനസ്സുവേണം...............ഒരിക്കലും ഇളകാത്ത മനസ്സ്............

    ReplyDelete
  18. പ്രണയം
    തൂവല്‍ സ്പര്‍ശം പോലെ
    നിന്നെ ഉരുമ്മി പോവുകയില്ല.
    ഉറയൂരിയ വാളുപോലെ
    ജീവശ്വാസം അരിഞ്ഞു കളയും.
    മറികടക്കാന്‍ ആകാത്ത മരുഭൂമി പോലെ
    നിന്നെയത് തളര്‍‌ത്തിക്കളയും.

    ഈ വരികള്‍ എനിക്ക് വല്ലാതെ ഇഷ്ടപ്പെട്ടു. നല്ല അര്‍ത്ഥ ഭംഗിയുള്ള കവിത. നന്നായി ഭാനു. ആശംസകള്‍.

    ReplyDelete
  19. ഇഷ്ടപ്പെട്ടു, ഭാനു.ഈ വരികള്‍ .......ചങ്കുറപ്പില്ലാതെ പ്രണയിച്ചവര്‍ക്കെല്ലാം മാപ്പുകൊടുക്കാമെന്ന് തോന്നി.....

    ReplyDelete
  20. പ്രണയം നിറഞ്ഞു കവിഞ്ഞ കവിത കൊള്ളാം

    ReplyDelete
  21. പ്രണയം തീയിലൂടെ ഉള്ള നടത്തമാണ്. മരണം എത്ര ഭേദം!

    ReplyDelete
  22. അര്‍ദ്ധമനസ്ക്കരിലൊരാളായി ഇറയത്ത് ഞാനും, നനയാതെ മഴകാണുന്നു..
    കവിത വളരെ ഇഷ്ട്പെട്ടു..

    ReplyDelete
  23. അതെ ചങ്കുറപ്പില്ലാത്തവര്‍ക്കു പൊള്ളല്‍ മാത്രമാവും ഫലം.
    പ്രണയ വാഴ്ത്തു നല്ലത്.

    ReplyDelete
  24. ‘ചങ്കുറപ്പില്ലാത്തവന്‍ പ്രണയിക്കരുത്;
    അര്‍ദ്ധമനസ്ക്കനെ
    പ്രണയമഴ പുല്‍കുകയില്ല...’

    വളരെ ശരിയ്യായ കാര്യം..!

    ReplyDelete

  25. മരണം മുന്നില്‍ കണ്ടവന്റെ
    അവസാന ജീവവായുവാണ് പ്രണയം.
    വിശക്കുന്നവന്‍ ആര്‍ത്തിയോടെ വാരി വിഴുങ്ങിയ
    അഗ്നിനാളങ്ങളാണ് പ്രണയം.

    ReplyDelete

Post a Comment

Popular posts from this blog

ആരാണ് രക്തസാക്ഷി?

സ്നേഹം എന്നാല്‍ എന്താണ്?