Posts

Showing posts from December, 2012

ആകാശമേ...

പാല്‍ മുലകള്‍ വറ്റിപ്പോയ  ആകാശമേ  നീ നിസംഗയാകുമ്പോള്‍  ഞാനിങ്ങനെ  മരുഭൂമിയാവുകയല്ലാതെ മറ്റെന്ത് ? എന്നിലേക്ക്‌ ചൊരിയാന്‍  നിന്നില്‍ കണ്ണീര്‍ക്കണം പോലുമില്ലെന്നാല്‍  മൃതിയാവുക തന്നെ. ആകാശമേ  എന്നാണ് നീ നിന്റെ  കാരുണ്യമില്ലാത്ത തുറുകണ്ണുകള്‍ അടക്കുക, എന്നാണ് നീ ഒന്ന് വിയര്‍ത്ത് തണുക്കുക,  നിന്നില്‍ നിന്നും എന്നിലേക്ക്‌  നിന്റെ സ്വേദങ്ങള്‍ ഒഴുക്കുക? എന്റെ മണല്‍ തിരകളില്‍  ഒളിച്ച ഉദ്യാനങ്ങളെ  മുത്തം വെച്ച്  നീ എന്നാണ് ഉണര്‍ത്തുക.

ഗ്രാമത്തെ നഗരങ്ങളിലേ​ക്ക് പരിഭാഷപ്പെ​ടുത്തുമ്പോ​ള്‍

പുലരുന്നതിനു മുന്‍പ്
അമ്മയുണരുന്നു. ഇരുട്ടില്‍ വിളക്ക് കത്തിച്ചു വെക്കുന്നു. വിളക്കില്‍ നിന്നും അടുപ്പിലേക്കൊരു ദീപം കൊരുക്കുന്നു ഞങ്ങള്‍ക്കായി ഒരു ദിനം വേവിച്ചെടുക്കുന്നു. പുലരുന്നതിനു മുന്‍പ് അച്ഛനുണരുന്നു. പുഴയെ വയലിലേക്ക് വെട്ടിയൊഴുക്കുന്നു. ഞങ്ങള്‍ ഉണരുമ്പോള്‍ പാടം വിളഞ്ഞു നില്‍ക്കുന്നു. ഗ്രാമമുപേക്ഷിച്ചു ഞങ്ങള്‍ നഗരത്തില്‍ ചെന്ന് രാപാര്‍ക്കുന്നു. അവിടെ ഇരുളുകയോ വെളുക്കുകയോ ചെയ്യുന്നില്ല. ഉണരുകയോ ഉറങ്ങുകയോ ചെയ്യുന്നില്ല. പുഴ പൈപ്പില്‍ നിന്നും ചോരയായി ഇറ്റുന്നുണ്ട്. വെന്തു ചീഞ്ഞ ഓര്‍മ്മകള്‍ അടക്കം ചെയ്യാന്‍ വയ്യാത്തതിന്റെ അവസാനിക്കാത്ത ചര്‍ച്ചകളാണ് എങ്ങും.

നീ അരികിലുള്ളപ്പോള്‍...

നീ അരികിലുള്ളപ്പോള്‍
ഞാന്‍ സ്വപ്‌നങ്ങള്‍ ഒന്നും കാണുകയില്ല.
എന്റെ എല്ലാ സ്വപ്നങ്ങളും
നീ ആയിരുന്നു.
സ്വപ്നത്തെ കെട്ടിപ്പിടിച്ചു ഉറങ്ങുന്നവന്‍,
സ്വപ്നത്തെ തന്റെ ചുണ്ടുകള്‍കൊണ്ട്‌
ഉമ്മവെക്കുന്നവന്‍
ഉറക്കത്തിനിടയില്‍,
സ്പര്‍ശവും ഗന്ധവും സ്വരവുമില്ലാത്ത
പാഴ് കിനാവുകള്‍ എന്തിനു കാണണം.

നീ അരികിലുള്ളപ്പോള്‍
ഞാന്‍ ജീവിതത്തെ ഭയക്കുകയില്ല.
നിന്റെ കരവലയങ്ങളില്‍ എന്റെ ജീവിതം
ശാശ്വതമായിരിക്കുന്നു.

നീ അരികിലുള്ളപ്പോള്‍
ഞാന്‍ കവിതകള്‍ എഴുതുകയില്ല.
അപൂര്‍ണ്ണനായ ഒരു മനുഷ്യന്റെ
ഗതികെട്ട ജല്പനങ്ങള്‍ ആയിരുന്നു
എന്റെ കവിതകള്‍.
നിത്യ ശാന്തിയുടെ
കൊടുമുടിയില്‍ ഇരിക്കുന്നവന്
പൂജാപുഷ്പ്പങ്ങളും മന്ത്രങ്ങളും എന്തിന്?

കൊടുങ്കാറ്റ് ഉണ്ടായത് എങ്ങനെ ?

ഒരില  മറ്റൊരിലയോട്മറ്റൊരില  അടുത്തൊരിലയോട്  അടുത്തൊരില  വേറൊരിലയോട്  വേറൊരില പിന്നൊരിലയോട്  പിന്നൊരില  ശേഷമൊരിലയോട്  ശേഷമൊരില ഒരുപച്ചയിലയോട്  പച്ചയില  മഞ്ഞയിലയോട്  മഞ്ഞയില  ഒരു കുഞ്ഞിലയോട്  കുഞ്ഞില തളിരിലയോട്  ചോദ്യങ്ങള്‍  ചോദിച്ചു  ചോദിച്ച്  മരമൊന്നാകെ  ആടിയുലഞ്ഞ്   അ മരം  ഇ മരത്തോട്  ഇ മരം  ഉ മരത്തോട്  ഉ മരം  എ മരത്തോട്  എ മരം  ഒ മരത്തോട്  ചോദ്യങ്ങള്‍  ചോദിച്ചു  ചോദിച്ച്  മരങ്ങളാകെ  ആടിയുലഞ്ഞ്  ചെറു കാറ്റായി  ചെറുകാറ്റുകള്‍ കൈകോര്‍ത്തൊരു  കൊടുങ്കാറ്റുണ്ടായി.

മുലകള്‍ക്ക് ചരിത്രത്തിലുള്ള പങ്ക്

Image
പ്രണയാഭ്യര്‍ത്ഥന നടത്തിയവളുടെ
മൂക്കും മുലയും മുറിച്ച്
ആര്യവംശത്തിന്റെ ഭ്രാതൃസ്നേഹം
വിളംബരം ചെയ്തിട്ടുണ്ട്.

മുല പറിച്ചെറിഞ്ഞു നഗരമെരിയിച്ചിട്ടുണ്ട്,
എന്നെ കൊന്നുകൊള്ളുവിന്‍
എന്‍ മുല 
കുഞ്ഞുങ്ങള്‍ക്കായി തുറന്നുകൊടുക്കണമെന്നു
കേണപേക്ഷിച്ചിട്ടുണ്ടൊരുവള്‍.
മുലക്കരം ചോദിച്ചതിന്
മുലയരിഞ്ഞു കൊടുത്തിട്ടുമുണ്ടൊരുവള്‍.
മാറ് മറക്കുവാന്‍ പോരടിച്ചിട്ടുണ്ട്.

അമ്മതന്‍ മുലപ്പാല്‍  കുടിച്ച ധീരരുണ്ടായിട്ടുണ്ട്,
അമ്മക്കായി ജീവന്‍ ബലിയായിട്ടുണ്ട്.

ഫ്രഞ്ച് വിപ്ളവസ്വാതന്ത്ര്യത്തിന്‍ അമ്മ
നിറമാറ്‌ രണധീരര്‍ക്കായി തുറന്നുകൊടുത്ത്‌
പുതിയ ലോകത്തിന്റെ  പതാക പറത്തിയിട്ടുണ്ട്.

എന്നിട്ടും മുലയെന്നു
പറയുമ്പോള്‍
തെറിയെന്നു ആക്രോശിക്കുന്നുണ്ട്
സദാചാര തമ്പുരാക്കന്മാര്‍.