പരാശക്തിയെപ്പോല്‍ നീ വരികില്‍

പ്രണയിക്കുന്നവന്റെ ഘടികാരം
പ്രണയിനിയുടെ ഉമ്മകളാല്‍
ചലിച്ചുകൊണ്ടിരിക്കുന്നു.
അവന്റെ സമയസൂചിയില്‍ 
അവളുടെ ചുണ്ടുകളുടെ ചൂടുണ്ട്.
അവളുടെ സ്പര്‍ശം അകന്നു പോകെ 
ഉടഞ്ഞ ചില്ലുപാത്രത്തിലെ 
രക്തം കലര്‍ന്ന ഹിമകണങ്ങളെപ്പോല്‍ 
അവന്‍ ഘനീഭവിക്കുന്നു.
ഉരുകി വീഴുന്ന ശരീരമായി 
അവന്‍ നിലം പറ്റിപ്പോകുന്നു.
അപ്പോള്‍ പിരമിഡ് ചുമരുപോലെ
അവന്റെ വീടിനു ശവഗന്ധം വരുന്നു.
അവന്റെ ഉടലില്‍
മമ്മികള്‍ നിറഞ്ഞു കവിയുന്നു.
പരാശക്തിയെപ്പോല്‍
നീ വരികില്‍ സഖീ..,
അവന്റെ നെഞ്ചില്‍ നീ നിന്റെ പാദം വെക്കുകില്‍,
അവനിലൊരു അസുരവാദ്യമുണരും
അവന്‍ നിമിഷങ്ങളായി പെരുകും
കാല ചക്രത്തിന്‍ ഗതിവേഗമവനാവും .

 

Comments

  1. ഒന്നും മനസ്സിലായില്ലയെന്നത് സത്യം
    അതുകൊണ്ട് പിന്നെയും വരും

    ReplyDelete
    Replies
    1. ഒന്നും മനസ്സിലായില്ലെന്നു ചൊന്നതി-
      ന്നിന്നു ഞാന്‍ നല്കുന്നൊ,രായിരം ചെണ്ടുകള്‍.....
      രാജാവ് നഗ്നനാ,ണെന്നറിഞ്ഞീടുകില്‍
      നേരായ മാര്‍ഗ്ഗം തെളിഞ്ഞേ വരും ദൃഢം.....

      Delete
  2. “ശക്തി” യില്ലെങ്കിൽ “ശിവനെ”വിടെ?.. അല്ലേ?

    അവൾ വരട്ടെ...നെഞ്ചിൽ പദമൂന്നട്ടെ.... ഡമരുകമുണരട്ടെ.... അനാദിയാം പ്രണയമൊഴുകട്ടെ...!!

    അതിമനോഹരമായിത്തന്നെ എഴുതി..

    ശുഭാശംസകൾ.......

    ReplyDelete
  3. പിന്നെ അസുരന്മാരുടെ ഭരണം വരുമോ?

    ReplyDelete
    Replies
    1. :) മുഹമ്മദ്‌ ജി, അസുരവാദ്യത്തിന് വാദ്യകലയില്‍ അതിന്റെ ശബ്ദ ഗാംഭീര്യവുമായി ആണ് അതിന്റെ ബന്ധം എന്ന് അറിയാമല്ലോ അല്ലെ.

      Delete
  4. ആഹാ! ഈ കല്‍പനകള്‍ ഇഷ്ടപ്പെട്ടു...

    ReplyDelete
  5. ഭാനു,അജ്ത്ത്ചേട്ടന്‍ പറഞ്ഞത് ശരിയാണ്‌ .
    കൊടിയ വാക്കുകളെഴുന്ന് നില്‍ക്കുന്ന ഈ കവിത അല്പം ദുരൂഹമായിത്തോന്നുന്നു ...

    ReplyDelete
    Replies
    1. വളരെ ശക്തമായ ബിംബങ്ങള്‍കൊണ്ട് കവിത എഴുതുന്ന വഴിമരങ്ങള്‍ക്ക് കവിത ദുരൂഹമായതില്‍ അത്ഭുതം കൊള്ളുന്നു.

      Delete
    2. ശരിയാണ് ഭാനു
      വഴിമരങ്ങളുടെ ചില കവിതകള്‍ക്ക് മുന്നിലും ഞാന്‍ മുട്ടിടിച്ച് വീഴാറുണ്ട്

      Delete
  6. പരാശക്തിയെപ്പോല്‍
    നീ വരികില്‍ സഖീ..,

    അങ്ങിനെ വരട്ടെ.
    എന്താകുമെന്നു കാണാമല്ലോ.

    ReplyDelete
  7. അർദ്ധനാരീശ്വരൻ.അവളില്ലെങ്കിൽ അവനില്ല. വസന്തം തളിർക്കട്ടെ അവളുടെ വരവാൽ. നല്ല കവിത.

    ReplyDelete
  8. ഭാനു,സുല്ല് ....


    അജിത്‌ ചേട്ടനോട് പത്ത് പറയട്ടെ

    അജിത്തേട്ടാ ദുഷ്ടാ..കൂടെ നിന്നവന്റെ കുതികാലിനു വെട്ടിയല്ലോ???? :)

    ReplyDelete
  9. ഭാനു ,കാല്‍പനിക ഭാവത്തില്‍ കൂടി സഞ്ചരിച്ചു
    അവസാനിപ്പിച്ചിരിക്കുന്ന ബിംബ കല്പനകള്‍ നന്നായിരിക്കുന്നു

    അവന്റെ നെഞ്ചില്‍ നീ നിന്റെ പാദം വെക്കുകില്‍,
    അവനിലൊരു അസുരവാദ്യമുണരും
    അവന്‍ നിമിഷങ്ങളായി പെരുകും
    കാല ചക്രത്തിന്‍ ഗതിവേഗമവനാവും.
    (അവസാനം ഈ വരികളേ കാള്‍ പറയുവാന്‍ വേറെ വാക്കുകള്‍ ഇല്ലാത്തത് കൊണ്ട് അതെ വരികള്‍ എടുത്തു എഴുതുന്നു )

    ReplyDelete
  10. പ്രണയത്തിന്‍റെ പ്രാണന് ഇങ്ങിനെയും വ്യാഖ്യാനം...അഭിനന്ദനങ്ങള്‍ !

    ReplyDelete
  11. ബിംബകൽപ്പനകളുടെ തീവ്രത ആസ്വദിക്കാനാവുന്നു....

    ReplyDelete
  12. പ്രണയത്തെക്കുറിച്ച് എഴുതിയെഴുതി,ഉരുകിയുരുകിതീരണം നമ്മള്‍,,,,,,

    ReplyDelete
  13. ദീപസ്തംഭം മഹാശ്ചര്യം, ഞാന്‍ കുറച്ചു വിവരം ഉണ്ടാക്കി തിരിച്ചു വരാം! പുരാണങ്ങള്‍ പോടീ തട്ടി എടുക്കണം ആദ്യം!
    ആശംസകള്‍ !

    ReplyDelete
  14. പ്രണയത്തിന്‍റെ പുതുമയുള്ള ബിംബാവിഷ്ക്കരണം...:)

    ReplyDelete
  15. ഒരുപാടു കാലത്തിനു ശേഷം വീണ്ടും വന്നതാണിവിടെ, വെറുതെയായില്ല, നന്ദി, ഒരുപാടൊരുപാട്..

    ReplyDelete
  16. കുറച്ചൊക്കെ മനസ്സിലാകുന്നു. എങ്കിലും കവിത മനസ്സിലാക്കാന്‍ നമ്മുടെ ഭാഷാജ്ഞാനവും ധൈഷണികതയും കൂടെണ്ടിയിരിക്കുന്നു എന്നും മനസ്സിലാക്കുന്നു

    ReplyDelete
  17. ഒന്നും മനസ്സിലാകുന്നില്ലെങ്കിലും കവിത മികച്ച വായനാനുഭവം തരുന്നുണ്ട് ......ആശംസകള്‍

    ReplyDelete
  18. അവനിലുള്ള നാരീയംശം തന്നെയല്ലോ ശരിയായ പ്രണയ ബിംബം അല്ലെ ഭായ്

    ReplyDelete

Post a Comment

Popular posts from this blog

പ്രണയം വിപ്ലവമാണ്

ആരാണ് രക്തസാക്ഷി?

സ്നേഹം എന്നാല്‍ എന്താണ്?