Posts

Showing posts from February, 2015

എഴുത്തിന്റെ ചാരുകസേരയിൽ

എഴുത്തുകാരന്റെ തൂലികയിൽ നിന്നും
അക്ഷരക്കൂട്ടം ഇറങ്ങിവരുന്നത്
കൊയ്ത്തു കഴിഞ്ഞ പാടത്ത്
താറാവിൻ കൂട്ടം
ഇറങ്ങുന്നതുപോലെയാണ്.

എഴുത്തുകാരൻ
തന്റെ തൂലിക കൊണ്ട്
താറാവുകളെ മേക്കുന്ന ഇടയനെപ്പോലെ
അവയെ നിയന്ത്രിച്ചുകൊണ്ടിരിക്കും

താറാവുകൾ പാടം നിറഞ്ഞുകഴിയുന്പോൾ 
അവയെ അവയുടെ പാട്ടിനു വിട്ടുകൊണ്ട്
ചാരുകസേരയിലിരുന്ന്
ഇടയൻ ഒരു പുകക്കു തീ കൊളുത്തും.

അപ്പോൾ താറാവുകൾ
അരയന്നങ്ങളാകും
വെള്ളിവെളിച്ചം നിറഞ്ഞ
ജലാശയമാകും പാടം.

വെണ്‍ ചിറകുകൾ വീശി
ആകാശ നീലിമയിലേക്ക്‌
തന്റെ അക്ഷര അരയന്നങ്ങൾ
പറന്നുപോകുന്ന കാഴ്ച്ചയുടെ ചാരുതയിൽ -

അവന്റെ അക്ഷരങ്ങൾ
കവിതയുടെ കറുപ്പുള്ള,
കവിതയുടെ ഈണമുള്ള
കുയിലുകളായി
ദേശാടനം ആരംഭിക്കും.