ഇരുട്ടിലേക്ക് കുഴിച്ച കിണറുകൾ

പിടഞ്ഞുകൊണ്ടിരിക്കുന്ന വിഷ ധമനികളുമായി
മുറ്റത്ത് തുറന്നു വെച്ചിരിക്കുന്ന
ഒറ്റക്കണ്ണൻ കിണറുകൾ
ഇനി അടച്ചുകളഞ്ഞേക്കാം.
നിത്യ അന്ധതയെ കാത്തിരിക്കുന്ന
ഒരു ഗ്ലോക്കോമാ രോഗിയുടെ കണ്ണുകളെപ്പോലെ
ആസന്നമായ ഇരുട്ടിലേക്ക്
എന്തിനാണീ കിണറുകൾ തുറന്നു വെച്ചിരിക്കുന്നത്?

ഈ കിണറുകൾ നമ്മെ പലതും ഓർമ്മിപ്പിക്കുന്നു.
വിശന്നു കരഞ്ഞു കണ്ണീർ വറ്റിയ
ഒരു പൈതലിന്റെ കണ്ണുകൾ പോലെ
ഭൂമിയുടെ കരച്ചിലായി നമ്മുടെ മുറ്റത്ത്
എന്തിനീ കിണറുകൾ സൂക്ഷിക്കണം ?
ഓർമ്മകളുടെ വീണ്ടെടുപ്പുപോലെ
നമ്മുടെ ഭൂതകാലത്തിലേക്ക് കുത്തിയിറക്കിയ
ഈ കിണറുകൾ നമുക്ക് അടച്ചുകളയാം.

മരണം കാത്തിരിക്കുന്നവന്റെ
ശ്വാസനിശ്വാസങ്ങൾ പോലെ
ജീവിതത്തിന്റെ പിടച്ചിലുകൾ ഓർമ്മിപ്പിക്കുന്ന,
വറ്റിപ്പോയ പുഴയുടെ ശവങ്ങളും
കോരിക്കൊണ്ടുപോയ കുന്നുകളുടെ കഥകളും
മണ്ണിട്ട്‌ മൂടിപ്പോയ വയലുകളുടെ
വീർപ്പു മുട്ടലുകളുമായി
മുറ്റത്ത് എന്തിനീ കിണറുകൾ ?

മരണത്തിന്റെ വിതുന്പലുമായി
കറുത്ത ചന്ദ്രൻ പനിച്ചുകിടക്കുന്ന ആഴങ്ങളായി
ഈ കിണറുകൾ നമുക്കിനി വേണ്ട.
നിരന്തരം അടഞ്ഞുപോകുന്ന ജീവിതത്തിന്റെ
അസ്തമനകാലമേ 
നിനക്കിനി ഇരുട്ട് മാത്രമാണ് കൂട്ട്.
എന്റെ കണ്ണുകൾ അടച്ചുകളഞ്ഞ്
അന്ധരുടെ വഴികളിൽ
അന്ധതയിലേക്ക് എന്നെ നടത്തുക.

എന്റേയും എന്റെ തലമുറയുടെയും
ജീവനുള്ള ശവങ്ങൾ വീണു വീണ്
ഈ കിണറുകൾ അടഞ്ഞുപോകട്ടെ.

Comments

  1. മനസ്സിലായില്ല ഭാനൂ.

    ReplyDelete
    Replies
    1. പ്രകൃതിക്ക് മേൽ നമ്മുടെ കയ്‌യേറ്റം അനസ്യൂതം തുടർന്നു കൊണ്ടിരിക്കുന്പോൾ, പ്രതീക്ഷകളുടെ കിണറുകൾ വറ്റിക്കൊണ്ടിരിക്കുന്പോൾ .... എന്തെഴുതാൻ അജിത്തേട്ടാ .

      Delete
    2. ങ്ഹൂം. ഇപ്പോള്‍ രൂപം തെളിയുന്നു

      Delete
  2. തുടര്‍ച്ചയായ ഉപമകള്‍ വളരെ ഇഷ്ടായ്.................കവിതയും.

    ReplyDelete
  3. വായനക്കും സ്നേഹത്തിനും നന്ദി ചങ്ങാതി.

    ReplyDelete
  4. മണ്ണടിഞ്ഞുകൊണ്ടിരിക്കുന്ന മനോഹരമായ ഭൂമി..

    ReplyDelete

  5. മരണം കാത്തിരിക്കുന്നവന്റെ
    ശ്വാസനിശ്വാസങ്ങൾ പോലെ
    ജീവിതത്തിന്റെ പിടച്ചിലുകൾ ഓർമ്മിപ്പിക്കുന്ന,
    വറ്റിപ്പോയ പുഴയുടെ ശവങ്ങളും
    കോരിക്കൊണ്ടുപോയ കുന്നുകളുടെ കഥകളും
    മണ്ണിട്ട്‌ മൂടിപ്പോയ വയലുകളുടെ
    വീർപ്പു മുട്ടലുകളുമായി
    മുറ്റത്ത് എന്തിനീ കിണറുകൾ ?

    ReplyDelete
  6. ഇരുട്ടല്ല....നിനക്കിനി വെളിച്ചം മാത്രമാണ് കൂട്ടെന്നു പറയു...അതാണ്‌ ശരി ..

    ReplyDelete

Post a Comment

Popular posts from this blog

പ്രണയം വിപ്ലവമാണ്

ആരാണ് രക്തസാക്ഷി?

സ്നേഹം എന്നാല്‍ എന്താണ്?